Kyntu ka VPP iaka sorkar ban ai por hynriew bnai iaka expert panel ban bishar iaka ‘reservation policy’

Syllad | The Rising MeghalayaSeptember 5, 2023

Ka Voice of the People Party (VPP) hynne ka sngi Nyngkong ka la kyntu ia ka sorkar jylla ba kan pynkylla ia ka rai ba dang shen jong ka ban aipor ia ka Expert Committee ba kan pyndep ban bishar bniah ha kaba iadei bad ka bhah thungkam thungjam ne ka reservation policy ha ka jylla hapoh ka shi snem.

Ha ka shithi sha u Myntri Rangbah ka jylla u Conrad K Sangma, u general secretary ka VPP u Dr Ricky AJ Syngkon u la ong ba na ka liang ka party kam shym la poi pyrkhat ba ka jingai por jong ka sorkar ia ka expert committee kan long haduh shi snem bad kaba donkam ban pyrkhat arsien ha ka liang jong ka sorkar jylla.

 “Na ka liang ka party VPP ka kyntu ban shim ia ka jingpynsngew kaba shong nongrim jong ka ba dei ban ai por ia ka committee hynriew bnai ba kan pyndep ia kane ka kam,” ong utei u nongialam ka VPP.

Na ka liang u Dr Syngkon u ai khublei ruh ia u CM ka jylla halor ka jingpynurlong ia ka jingkular jong u na ka bynta ban thaw ia ka expert committee na ka bynta ban bishar bniah biang ha kaba iadei bad kane ka policy.

Na ka liang ka party ka kyrmen ruh ia kaba bha tam na ka bynta ka committee ba kan lah ban wan ha ryngkat ki jingai jingmut kiba biang bad kiba lah ban pdiang, kata ki ban pynurlong halor ka nongrim jong ka jingkhuid bad ka jinglong mar ryngkat ha ka jingai bhah hapdeng ki jaidbynriew Khasi bad Garo.