Kyntu ka VPP ia ka KHADC ban pan jingshai na u Syiem Hima Mylliem halor ka ‘Law Adong ha Mawpat

Syllad | The Rising MeghalayaJuly 17, 2025

Ka Voice of the People’s Party (VPP) ka la kyntu ia ka Khasi Hills Autonomous District Council (KHADC) ba kan pan jingshai na u Syiem ka Hima Mylliem ha kaba iadei bad ka ‘Law Adong ha Mawpat.

Ha ka shithi ba la phah sha Chief Executive Member ka KHADC u Bah S Rynjah ha ka 16 tarik Naitung, ka VPP ka pyntip ba ka kynhun ba la ialam da u President ka VPP u Bah Ardent Miller Basaiawmoit ka la pynlong ka jingleit jurip ia ka Law Adong ha ka 15 tarik Naitung bad lap ia ki katto katne ki jingbym iaid beit, kynthup ia ka jingkynnoh die ia ka jaka sha ki riew shimet bad ki nongmihkhmat paidbah.

Ka kynhun ka pynpaw ruh ka jingkyndit ban lap ba u mawnongrim ba la pynieng kum shibynta jong ka jingiateh hapdeng ka Hima Mylliem bad ka KHADC u la jah rngai.

Ka VPP ka pynpaw ka jingsngewkhia jur halor ka jingktah ia ka mariang namar kine ki jingleh jingkam kumba la kynnoh, kata kynthup ka jingpom pathar ia ki dieng bad ka jingshna surok lyngba katei ka khlaw.

Nalor kata ka la kynnoh ba la ai jaka sha ka Tnad PHE bad ruh na ka bynta ka jingshna ia ka surok ban leit sha New Shillong.

“Kumta ngi pan ka jingshai la ka KHADC ka don jingtip ne em halor kine kiei kiei baroh kiba la jia hapoh Law Adong. Lada kam don jingtip, ngi kyntu ba kan pan jingshai na u Syiem ka Hima Mylliem halor katei ka kam khnang ban lah ban iada bad pynneh pynsah ia ka Law Adong,” ong ka party ha katei ka shithi.

Na ka liang ka party ka la ban jur halor ka jingdonkam ban iada ia ka Law Adong kumjuh ia ka Law Kyntang ha ka Jylla.