Kyntu ka Synjuk Waheh Shnong Ri Jaintia iaki nongshong shnong ban pyniasoh iaka Aadhaar bad Card Rashon ban ioh khaw rashon

Syllad | The Rising MeghalayaApril 7, 2025

Ka Synjuk Waheh Shnong Ri Jaintia (SWSRJ) ka pynpaw ka jingsngewnguh bad dap da ka jingsngewkmen ia u myntri ka tnad Food Civil Supplies & Consumer Affairs ka sorkar Jylla Ma Commingone Ymbon, u Commissioner & Secretary FCS&CA Parvin Bakshi, IAS, ka Director FCS&CA ka S Verma, IAS, halor ka jingshimkhia ban khot ia baroh ki khlieh nongsynshar Shnong jong ka Jylla ban iasyllok bad phylliew jingmut ha kaba iadei bad ka kam bam khaw rashon hapoh ka jylla.

Iaka jingialang phylliew jingmut, kaba la long haka 4 tarik Iaiong lyngba ka Video Conference ha Main Secretariat Conference Hall, Shillong la iashim bynta da ki khlieh nongsynshar shnong kynthup ka Synjuk Waheh Shnong Ri Jaintia (SWSRJ), Synjuk ki Nongsynshar shnong ka Bri u Hynniewtrep, Synjuk Rangbah shnong Ri Bhoi, kumjuh ki Nokmas Council jong ka ri lum Garo bad ki seng treimon sngewbha.

U president ka Synjuk Waheh Shnong Ri Jaintia u Ma A. Lipon ula iathuh ba ha katei ka jingialang la iakren ia phylliew kumno ban pynsngewthuh sha baroh ki nongbam khaw ration hapoh ka jylla na ka bynta ban pyniasoh bad u Aadhaar card bad Card Rashon da kaba ban leit pyniasoh da kaba leh ia ka eKYC ha ki Fair Price Shop ne Dealer Centre haki shnong jong ki.

Nalor kata ban iarap pynsngewthuh ruh ba ym dei ban tieng ban shondur Aadhaar, ia kito kiba ym pat dep ban shon ban lait na kaba shah pynduh khaw ration, namar ka sorkar kmie ne sorkar India ka la shim bad bthah ia baroh ki jylla ba kim dei ban pynslem shuh ban pyndep ka shon Aadhaar bad leh ia ka eKYC ba iadei bad ki nongbam ration lym kumta kin sa shah pynduh khaw ration noh hadien ka 30 tarik Jylliew (June) 2025.

Ula ong ruh haba bishar ia baroh ki jylla, ka jylla Meghalaya ka dang duna bha shaba palat ban shon Aadhaar, kumta ha kaba iadei bad kane ula ong ba u Myntri Ma Ymbon ula pynpaw ka jingsngew bynniaw khamtam iaki duk ki suk lada ki shah pynduh khaw ration tang na ka daw ba ki tieng ban shon Aadhaar ne pyniasoh lyngba ka eKYC ne Epos Machine ha Fair price Shop center jong ki.

Ula ong ba u Myntri ula ban jur bad kyntu ia baroh ki nongtrei ka Supply naduh ki Deputy Commissioner Supply, ki nongsynshar shnong, ki Nokmas Council, bad kiwei kiwei ki nongtrei mon sngewbha ban pylleit jingmut ban iarap pynsngewthuh katba lah ba ki nongshong shnong jong ka jylla Meghalaya kin shon Aadhar bad pyniasoh hapoh kine ki lai bnai ha shuwa ban dier ka por ne ka lad ba khatduh ia baroh ki nongbam khaw ration.

Ha kaba iadei bad kane na ka liang ka Synjuk Waheh Shnong Ri Jaintia (SWSRJ) ka khot ia baroh nongshong shnong ban wan sha khmat khlem jingtieng bad jingartatien ban shon Aadhaar Card noh bad pyniasoh noh ia ka eKYC ne Aadhar Seeding of Ration Cards.