Kyntu ka Synjuk Waheh Shnong ia u Myntri Tourism ban kyntiew ia ka kam jngohkai ha Chutwakhu, Iooksi bad Saphai

Syllad | The Rising MeghalayaJuly 13, 2025

Ka Synjuk Ki Waheh Shnong (SWS) Iooksi-Saphai Circle kaba don 13 tylli shnong kala kyntu ia u Myntri ka Tnad Tourism u Bah Paul Lyngdoh ban kyntiew ia ka kam jngohkai hapoh ka thain Chutwakhu, Iooksi bad Saphai.

Ka Synjuk Waheh Shnong kala aiti iaka dorkhas ha Kupli Orchid Resort haka sngi Saitjain.

Ha ka dorkhas ka Synjuk ka la pynpaw ba ka thain 13 Shnong Chutwakhu- Saphai ka don ia ka lad kaba khraw ban kyntiew ia ki kam jngohkai namar ka jingdon ia ki jaka kiba la khyrkhu ha ka jingitynand jong ka mariang bad ki sawdong sawkun bad ka kolshor kaba riewspah. Hynrei wat hapdeng kine ki jingdon ka kam jngohkai ha kane ka thain kam pat kynjoh sha kata ka kyrdan ba ka dei hok ban ioh ha kaliang ka kam tourism.

Ka Synjuk ha u kyrwoh lyngba u Bah Nangaibormi Sutnga General Secretary ka la ong ba lyngba ki sienjam ha ryngkat ka jingbei tyngka ka kyrmen skhem ba ia kine ki lad ki kabu ha kane ka thain yn lah ban pyntreikam na ka bynta ka jingmyntoi jong ki nongshong shnong bad ka jylla hi baroh kawei.

“Ka jingpynbha ia ka kam jngohkai ha ka lynti hapdeng ka Chutwakhu–Saphai ym tang ba kan pynkhlain ia ka ioh ka kot jong ka thain hynrei kan thaw ruh ia ki lad aikam ai jam sha ki nongshong shnong. Nalor kata kan ailad ruh ia ki nongwan jngohkai na kylleng ba kin sakhi ia ki jaka kiba kyrpang ba la pynlong da ka mariang ba ia ki riti dustur jong ka thain,” pynpaw ka Synjuk ha ka dorkhas.

Halor kane ka Synjuk ka la pynpaw sha u Myntri ban shimkhia lem halor ki mat kiba iadei bad ka jingpynroi ia ki kam jngohkai ha kane ka thain, kata da kaba kyrpad ban pynbna ia kine ki 13 tylli ki shnong naduh Chutwakhu haduh Saphai kum ki jaka jngohkai da ka Tnad Tourism ka Sorkar Jylla kumjuh ban kynthup hapoh ka jingpeit jingkhmih jong ka Tnad Toursim.

Ka la ong ba kane ka sienjam kan pynlah ia ki nongshong shnong ban ioh ia ki jingmyntoi na ki skhim bapher bapher ka sorkar bad ban ioh ia ka jingkyrshan pisa, kum ka ram ba iadei bad ki kam jngohkai bad ki prokram pynroi.

Ka Synjuk ka la aijingmut ruh halor ka jingdonkam ban pynkhuid bad ban pynim biang ia ka wah Kupli bad ka jingpynroi pat ia ki dohkha dohpnat kiba don hapoh jong ka khnang ban lah ban pynkhie im biang ia ka rukom khwai dohkha tynrai bad ban kyntiew ruh ia ka kam jngohkai bad ka jingpynneh pynsah ia ka mariang.

Nalor kata ka Synjuk ka tyrwa ruh ban pynroi ia ki kam ialehkai sport hapoh um kum ha ki jingiakop king lieng, kata ka kayaking, rafting, paddle boating hapoh ka wah Kupli kiba lah ban khring shibun ia kito kiba sngewtynnad ha kine ki kam ialehkai bad ruh ban kyntiew ia ka kam jngohkai.

Na ka liang u Myntri ha kane ka jingiakynduh ia ki nongialam ka Synjuk u la kular ban shimkhia ha kaba iadei bad kane ka jingangnud ka jong ki ban kyntiew ia ka kam jngohkai.