Wer ka Myntri ka Tnat Koit ka khiah iaki nongshong shnong ban wan shakhmat ban ai snam sngewbha

Syllad | The Rising MeghalayaOctober 2, 2023

Ka Myntri ka Tnat ka koit ka khiah ka sorkar jylla ka Kong Ampareen Lyngdoh haka sngi Nyngkong ka la leit iashim bynta ha ka jingrakhe ia ka “National Voluntary Blood Donation Day” ba la pynlong hapoh Nazareth hospital, Laitumkhrah Shillong.

Ha ka jingkren ka Myntri ka kyntu ia ki nongshong shnong ka jylla ba kin wan shakhmat na ka bynta kane ka kam ba kongsan khnang ban pynthikna ba ka jingthmu jong ka ‘Ayushman Bhav’ bad ka ‘Sewa Pakhwada’ kin iohlad ban rung ha manla ki thliew iing bad ki kyndong kynshrot ka jylla.

“Ka jingaisnam kaba shngain na ka bynta ki jingsumar ba kyrkieh ka long kaba kongsan kum ka jingdonkam ban ai snam mon sngewbha khnang ban pynthikna ba ki nongshong shnong kin ioh shisha ia ka jingmyntoi ha ki lad jingsumar,” ong ka Myntri da kaba bynrap ruh ba ka snam ba la noh synniang mon sngewbha da baroh ki kynhun ba la ithuh sha ki jaka pynlang snam ne blood storage centre ki long kiba kongsan na ka bynta ka jylla Meghalaya.

Ka la ong ruh ba ka jingai snam mon sngewbha ha kane ka jylla ka duna haduh 18% haba ia nujor bad ka 100% haba khein kyllum hapoh ka ri baroh kawei ne National Average. Kumta ka kynhun ia ki nongshong shnong ba kin wan shakhmat da ka jingmut jingpyrkhat ba laitluid ban pyrshang shakhmat ban ai snam khah khah da ka mon sngewbha.

Nalor kata ka Kong Ampareen ka long ruh ba ki jingngeit biej bad ki jingsngewthuh bakla ha kaba iadei bad ka jingai snam mon sngewbha ka dang iai bteng ban long ka jingeh hapoh ka jylla Meghalaya. Ka la ong ba ki jingpyrshang ban ai snam ban ioh kamai pisa hapdeng ki nongpang bad ki nongai snam kadei ka jingpyrshang kaba sniew shibun.

Haba kynmaw ia u Kpa jong ka Ri u Mahatma Gandhi ha ka lyngkhuh sngikha jong u, ki nongkren ha kane ka prokram ki la pyrto ia ka jingnoh synniang jong une u nongialam bakhraw na ka bynta ka ri, ha kaba la pynlong ruh ia kane ka prokram ha baroh kawei ka ri shibynta ban kynmaw burom ia u.

Shuh shuh ha kane ka prokram la pyrto ruh iaki 45 tylli ki kynhun ai snam mon sngewbha na ka thain East Khasi Hill bad Ri Bhoi District kiba la wan ai snam ha kane ka sngi ha kaba la ioh ruh ban leh burom na ka bynta jong ki.