Kyntu ka MUCF ia ka sorkar ban ym pynkut ia ka tamasa Cherry Blossom ha ka sngi U Blei

Syllad | The Rising MeghalayaOctober 25, 2023

Ka Meghalaya United Christian Forum (MUCF) haka sngi ba Ar ka la kyntu ia ka sorkar jylla ba ka dei ban burom ia ka jingsngew jong ki lak ngut ki paid Khristan da kaba pynkylla ia ka rai ban ym pynkut ia ka tamasa ‘Cherry Blossom’ ka ban wan ha ka Sngi U Blei.

Ha u kyrwoh ba la phah da u Chairman ka Forum u Rev Batkupar Dunai, ula pynpaw ba ka MUCF ka ngeit skhem ba man la ka sngi ka dei ka sngi kaba la ai sngewbha da U Blei, hynrei ka Sngi U Blei kadei ka sngi kaba khuid bad kaba kyrpang, kaba ki riewngeit ki leit ban mane ha ki ïingmane lait noh tang ia ki katto kane ki Balang kiba mane ha kiwei pat ki sngi.

“Ha kaba iadei bad kane ka tamasa Cherry Blossom kumba la sakhi ha ki lad pathai khubor ba kan kut ha ka Sngi U Blei, na ka liang ka Meghalaya United Christian Forum kan da sngewnguh eh ia ka sorkar jylla lada ka pynkynriah noh ia katei ka tarik pynkut da kaba pynlong noh ha kawei pat ka sngi, kata kum ka jingburom ia ka jingsngew jong ki lak ngut riewngeit ha ka jylla Meghalaya kiba shim ia ka Sngi U Blei kum ka sngi kaba kyrpang bad kaba kyntang kaba ki riewngeit Kristan kin ioh ban duwai bad ban mane ia U Blei khlem kano kano ka jingpynwit ne da kaba pynlong kino kino ki prokram ne tamasa” ong u Rev Batkupar Dunai.

Lah ban kdew ba ka sorkar jylla kala pynbna ba kan pynlong ia ka tamasa Cherry Blossom Festival kaba 3 sngi kynthih ka ban sdang naduh ka 17 tarik u Naiwieng bad ka ban kut ha ka 19 tarik u Naiwieng kaba dei ka Sngi U Blei.

Ha ka sngi Nyngkong ba la lah na ka liang ka Khasi Jaintia Christian Leaders Forum (KJCLF) ruh ha u kyrwoh lyngba u secretary Rev Dr EH Kharkongor ka pynpaw ba kam long pyrshah ia kane ka tamasa ba la pynlong da ka sorkar, hynrei ka kwah ban iai ban ba ka Sngi U Blei kadei ka sngi kaba kyntang jong ki paid Khirstan bad ki Balang bapher bapher.

Na ka liang ka Forum ka kyrmen ruh ba ka jingpynlong ia kane ka tamasa kan long hapdeng ka jingiaid beit bad hapdeng ka suk ka sain.