Kyntu ka MTDF ia ki national media ban don ka jingkitkhlieh haba pynmih ia ki khubor na North East

Syllad | The Rising MeghalayaMay 31, 2025

Ka Meghalaya Tourism Development Forum (MTDF) ha ka 30 tarik Jymmang ka la kyntu ia ki lad pathai khubor na ka ri ne national media ba kin don ia ka jingkitkhlieh haba ki pynmih ia ki khubor na ka thain Shatei Lammihngi (North East) jong ka Ri.

Kane ka jingkyntu ka la wan long hadien ba kawei na ki lad pathai khubor ka ri ka la kynthoh ia ka Meghalaya kum ka jylla kaba jur bha ki kam sniew haba pathai ia ka khubor kaba iadei bad ka jingjah rngai jong ki arngut ki shikurim kiba na Indore, Madhya Pradesh kiba la wan shangkai sngewbha sha ka thain Sohra.

Haba kren sha ki lad pathai khubor, u President ka MTDF u Bah Larsing Sawian u la ong, “Ngi kwah ban phaikhmat sha kawei ka jingthoh lyngba ka article kaba ha kawei na ki kotkhubor jong ka ri haka 29 tarik Jymmang kaba kynthoh ia ka rilum jong ngi kum ki jaka ba jur bha ki kam sniew. Mynta kane ka jingpynpaw ka long kaba sngewkhia shibun namar la kynthoh ba ka Meghalaya lane ka Rilum Khasi kum ka jaka kaba jia khah khah ki kam bymman bad kaba ialam bakla ia kaba dei ban pynrem jur.”

U la ong, “Baroh ngi tip ba ngi dei ka imlang sahlang kaba ieit ia ka jingsuk bad ia ki shnong ki thaw jong ngi hangne, ngi ngeit ha kaba pdiang sngewbha ia ki nongwan shangkai pyrthei bad kim ju don satia kino kino ki jingjia kiba iadei bad ki kam sniew bad kiwei pat ki jingjia pyrshah ia ki nongwan shangkai sha kane ka jylla Meghalaya.” “Katei ka jingkynthoh ka pyni ia ka Meghalaya kum ka jaka ka bym biang bad ka bym biang, bad ngi shim ia kane ka kabu ban kyrpad ia katei ka lad pathai khubor kaba pynmih ia kane ka jingthoh ba kan pynshai halor katei ka mat namar kaba kum katei ka jingkynthoh kan ktah jur shibun ia ka roi ka par kaba iadei bad ki kam jngohkai lane ban pynioh mynsiem ban khring shuh shuh ia ki nongwan shangkai sha ka jylla Meghalaya.”

Haba pynpaw ka jingsngewkhia halor katei ka jingjia, u Bah Larsing u la ong, “Kalong kaei kaei kaba sngew bynniaw ba haduh mynta ka sngi ym pat shym la lapdien satia ia kitei ki shijur kiba jah rngai, bad ngi kyrmen ba lyngba ka jingwad kaba dang iai bteng yn sa lap ia ki hapdeng ka jingshngain bad ka jingbit jingbiang.”

U la ong ruh ba ka Meghalaya ka dei ka jylla kaba la kiew shaphrang kum ka jaka jngohkai khamtam ha kine ki 10 snem ba la dep bad khamtam eh ha kine ki 5 snem kiba la dep.Ki jaka kum ka thain Sohra, Dawki bad ka thain South Khasi Hills baroh kawei kiba la kiew sted bha ha ki kam jngohkai ha ki thain nongkyndong ka dei ka khana jong ka kam jngohkai ha Meghalaya.

Haba pynpaw ba ka thain Shatei Lammihngi jong ka ri ka la kiew bha ha ka liang ka roi ka par, u Bah Larsing u la ong, “Ngi don ha ka bynta kaba kongsan bha ha ka khana jong ka jingkiew rasong hapoh ka ri ha kaba ki kam pynroi jong ka thain Northeast bad ka South East Asia bad kiwei pat ki jylla jong ka ri India ka long kaba kongsan bha na ka bynta ban kyniew ia ka ri bad ban don ban don ia ka jingiadei bad ka ri baroh kawei.”

Ha kaba iadei bad ka jingjia shah thombor lehnoh ba dang shen ha Pahalgam, u la ong ba ki don ki bor kiba kwah ban pyntroin ia ka kiew jong ka ri bad ki la trei ban pynpulom ia ka ri ka jong ngi ha ka por ba ngi la lah ban jam shakhmat ia ka Japan kaba dei ka ri kaba wan ba lai ha ka pyrthei ha kaba iadei bad ka GDP.

Kumta ruh da kaba kyntu ia ki lad pathai khubor ha ka ri, u president ka MTDF u la ong, “Ka khana ka jingkiew jong ka thain Shatei Lammihngi ka la sdang bad ka la iaid shakhmat bad ka dei ha kaba kum kane ka por ba ngi kyntu ia kine ki lad pathai khubor ba kin don ia ka jingkitkhlieh ha ka rukom ai ia ki khubor jong ki ha kaba iadei bad ki khubor na kane ka thain Shatei Lammihngi jong ka ri.”

“Ngi long kiba la kloi ban pdiang ia kino kino ki jingkynthoh kaba dei hok ban kynthoh, ngi kloi ban rah la ki kti jong ngi lada ka don kano kano kaba ngi dei ban pynbeit, hynrei ka jingpynmih ia kiei kiei ki bym shisha ha ki national media bad ban pynmih na ka bynta ki nongpule hapdeng kiba bun ki nongshong shnong jong ka ri ka dei kaei kaei kaba ngim lah ban pdiang kum ka thain bad kum ka ri, kumta ngi shim ia kane ka kabu ban kyrpad ia ki national media ym tang ban shu thaw ne pynheh ia ki khubor ki bym don ia ki jingshisha bad ban sngewthuh ruh ba ngi kwah ia ki khubor kiba long shisha kiba dei ban mih na kane ka thain jong ka ri,” u la ong.