Kyntu ka KSU Narpuh iaka MSPCB ban pynsangeh iaka public hearing pynheh par clinker bad pynmih bording ka karkhana dewbilat

Syllad | The Rising MeghalayaAugust 17, 2023

Ka KSU Narpuh circle ka pynpaw ka jingpyrshah ba jur halor ka jingthmu ka MSPCB ban khot ia ka jingpynsngew paidbah lane ka public hearing na ka bynta par mawshun ka Meghalaya Cement Ltd, Thangskai

Ka Meghalaya Cement Ltd kala mang ban pynmih clinker (dew sain dewbilat) na ka 2600 TPD sha ka 4500 TPD lem bad ka 10 MW CPP bad 9.5 MW WHRS

Katkum ka tarik kaba la buh kane ka jingpynsngew paidbah kan long ha ka 24/08/2023 ha MCL,  Thangskai.

Ka KSU haka sngi Balang kala ai da ka jingthoh sha u Member Secretary MSPCB, Shillong ban pypaw iaka jingpyrshah halor kane jingpynsngew paidbah.

U president KSU Narpuh Circle Ma KS Suchiang ula ong b aka KSU ka pyrshah na ka daw ba lada ailad ia kane ka jingthmu kan wanrah ka jingduh nong kaba khraw ia ka mei mariang. “Ngi sngewthuh kan ktah jur ia ka lyer kaba khuid (Oxygen) bad kan ktah ia ka ring mynsiem ki briew. Wat tang mynta ym lah ban tip haduh katno ka jingdon ne ka jinglong jingman ka lyer khuid (Air Quality) ha kito ki thaiñ ba don ki kharkhana dewbilat.”

U Ma KS Suchieng ula ong shuh shuh ba baroh ki jakhlia kiba mih na ka plant thymmai kan nang pynjaboh shuh shuh namar mynta ruh ki tyllong um kim long shuh ban pyndonkam namar kine ki company kim don ia ka STP.

Une u nongialam ka KSU ula ong kane ka jingpynheh ne tei plant thymmai kan wanrah bad ktah ia ka bor iohsngew ne kata ka sound effects. Kan mih ka jingsawa ba jur lyngba katei ka project WHRS khamtam eh ia ki khyllung khynnah ba dang lung ka rta bad lei lei ha ka por ba ki dangioh thiah bad kine ki long tang katto katne ki nuksa kiban ktah iaka mariang bad iaka bor met u briew..

Ka KSU kala pynpaw iaka jingsngewlyngngoh ba kumno ka MSPCB ka ailad ban pynlong ia katei ka jingpynsngew paidbah khlem da bishar bha ka don ne ka jingktah ia ki paidbah. Ka KSU kala buh jingkylli kumno yn ailad shi  ailad ia kine ki company ban ioh pyniar ia ka khaïi jong ki da kaba ki pynjot ia ka mariang. Ka seng ka kyntu ia ka MSPCB ban pynsangeh shwa ia katei ka jingthmu pynlong ia ka hearing bad bishar shwa ha baroh ki liang.