Kyntu ka KSU ia u BDO Laskein ban pynioh jingiarap iaki lanot shlei um

Syllad | The Rising MeghalayaJune 5, 2020

Ka Khasi Students’ Union (KSU), Laskeiñ Circle kala leit ban ia kynduh ia u Block Development Officer ka Laskein C&RD Block u ma B Langbang naka bynta ban kyrpad ia utei u khliehduh ka Ophis jong ka Laskein Block ban iarap iaki paid nongrep kiba shah ktah haka jingshlei um bad shah pynjulor ki jaka rep dansghen.

Ka KSU haka jingiakynduh bad u BDO ka Laskeiñ Block haka sngi Palei, ki la iathuh ba lajan baroh ki paid nongrep jong ka thaiñ Laskeiñ Block kila mad iaka jingeh kaba khraw namar ka jingshah pynjot haka mei mariang ha kine ki khyndiat sngi baladep naka jingshlei um. “Don ki ba pli ki nongrep kiba ladep thung ia u kba, hynrei naka daw ka jingshah pynjot ha ka mariang ki la hap ban thung biang sa shisien nalor ba hap ban pynkhuid iaki jaboh ki jabaiñ, ki shyiap ki maw bad ki dieng ki siej kiba u slap u ba jur u wanrah sha ki hali ki pynthor jong kiba pli ki nongrep” la ong Balawan Suchiang President ka KSU Laskeiñ Circle.

“Ka jinghap ban trei arsien iaka juh ka kam ka pynduh nong kaba khraw iaki paid nongrep nalor ba ka ktah iaka por thung por bet, ka ktah ruh sa iaka bor ka sor bad ka jinglut jingsep” la ong une u nongialam

Ki nongialam KSU kila pynpaw ruh iaka jingsngewkhia halor ka jingdon ki katto katne ki Waheh Shnong kiba hap hapoh ka Laskeiñ CRD Block kiba leh shilliang khmat bad kiba leh donbor marwei haba don kano kano ka kynja skim ne jingiarap na ka office jong ka block bad bun kiba ym ioh jingmyntoi na ki skim sorkar.

“Ki Waheh Shnong ki leh shiliang khmat da kaba jied hi marwei tang iaki briew kiba ki mon khlem kano kano ka jingpyntip paidbah  kaba biang lane khlem da tip ka Executive Committee jong ka shnong haba don ki lad jingiarap naka sorkar,” ong une u nongialam ka KSU.

Ki nongialam ka KSU ki la kyrpad jur ruh ia u BDO ba un sngewbha ban wad ki lad ki lynti bad kiwei kiwei ki lad jingiarap sha ki Nongrep na ka sorkar lyngba ka ophis ka jong u khnang ba kan kham iarap iaki paid Nongrep.