Kyntu ka JSU ia ka Myntri ban plie biang ia ka eksam centre ka MPSC ha Jowai

Syllad | The Rising MeghalayaAugust 4, 2023

Ka Seng Jaintia Students Union (JSU) Central Body haka sngi Palei ka la iakynduh ia ka Myntri ka sorkar jylla ka Kong Ampareen Lyngdoh ban pynpaw ka jingsngewkhia kaba jur ha kaba iadei bad ka jingkhang jong ka MPSC ia ka eksam centre ha Jowai khlem kano kano ka daw khnang ban plie biang ia ka.

Ka Seng ha u kyrwoh lyngba u President u Jersom Shylla bad u Secretary Treiborlang Suchen kala ong ruh ba kane ka jingkhang ia kane ka eksam centre kala pynkhie bitar ia ki nongshong shnong ka Jaintia Hills khamtam ki samla wad kam. Nalor kata ha ka jingthoh ba la ai sha kane ka Myntri, ka seng ka la dawa na ka Sorkar ba ka dei  ban plie biang ia kane ka centre khnang ban pynsuk ia ki samla wad kam jong ka thain.

Na ka liang ka JSU kala ong ba da ka jingdon kane ka centre ha Jowai, kala iarap shikatdei eh ia ki samla wadkam ha kaba kila lait ban leit shaduh Shillong ban ialeh ia ka eksam.Ha kane ka jingiakynduh na ka liang ka Myntri kala kular ban iakren ia kane ka mat sha ka jingiakren bad u Myntri Rangbah ka Jylla hashwa ban shim rai.