Kyntu ka JNC ban bishar biang iaka kyndon ioh license tih dewiong

Syllad | The Rising MeghalayaAugust 18, 2023

Ka Jaintia National Council (JNC) haka sngi Palei kala kyntu iaka sorkar jylla ban bishar biang iaka kyndon ne ka SOPs ban ioh license bad ka mining leases na ka bynta ban tih dewiong.

Haka dorkhat kaba la ai sha u Secretary of Mining & Geology Department (Meghalaya) u Bah Ethelbert Kharmalki, u Sambormi Lyngdoh ula pynpaw ba ha kaba iadei bad ki katto katne ki jingeh kiba iadei bad ki SOPs kiba katkum ka Office Memorandum jong ka sorkar  Meghalaya Vide No. 25 dated 5th March 2021 ka ktah jur ia ki trai kumjuh ia ki nongtrei par dewiong kiba dei ki trai shnong.

Na ka liang ka JNC kala kyntu iaka sorkar jylla ba kan bishar bniah bad pynduna ia ka jingheh jong ka jaka tih par na ka 100 hectare sha kaba kham rit khnang ba ki nongkhaii kiba rit kin lah ban aplai ia ka mining lease hapoh ka district.

Shuh shuh u Sambormi ula ong na kaliang u  Secretary ka tnat Mining u Bah Kharmalki ruh u la kubur ia ka jingsngewkhia jong ki nongkhaii bad ki nongtrei par dewiong ha kaba iadei bad kane ka bynta, bad pynpaw ruh ba kan sa don ka jingialang hapdeng ka sorkar jylla bad ka Ministry of Coal India ban iakren halor kane ka mat kaba iadei bad ka 100 hectare ka jaka ha kaba kan don ka jingpynduna.