Kyntu ka GAD ban pyndonkam ia u Aadhaar QR Code ban iada na ki kam thok

Syllad | The Rising MeghalayaAugust 28, 2025

Ka Tnad General Administration Department ka la pynmih ia ka jingbthah sha baroh ki Tnad ba dei peit bad ki paidbah ba kin pyndonkam ia u Unique Identification Authority of India’s (UIDAI) Aadhaar QR Scanner App na ka bynta ki jingpynshisha offline ia ki Aadhaar card khnang ban khanglad ia ka jingpyndonkam bakla ia ki Aadhaar card kiba shu thok ne ba shu shna thok.

Ka UIDAI ka la pynrung ia u Secure QR Code ha man la ki shithi Aadhaar, PVC card bad ka e Aadhaar ba download kaba don ia ki jingtip ba kongsan halor ka jingkhein ia ka jingdon briew bad ka dur jong uba don ia ka Aadhaar.

Ia une u code la soi da ki bor digital ba u bym lah ban pynjulor bad ia uba lah ban pule tang da kaba pyndonkam ia ka scanner ba la mynjur da ka UIDAI lane tang lyngba ka Aadhaar QR Code Scanner App jong ka sorkar.

U Secure QR Code u ai ia ki katto katne ki jingmyntoi, kiba kynthup ia ka jingpynshisha offline, kaba pynlong ba kan long kaba biang ban pyndonkam ha ki jaka kiba jngai kiba duna ki lad pyniasoh, ka jinglap ne ioh kem ba mardor ia ka jingbym iahap ne ki kot ki sla Aadhaar kiba shu thok bad ka pynkhlain ia ka jingshngain bad jingshaniah.

Ka Tnad ka la bthah ia baroh ki ophis, ki agency bad ki nongshong shnong ba kin pyndonkam ia u Aadhaar QR code verification bad ban long husiar na ka jingpyndonkam bakla ia ki kot ki sla kiba shu shna thok.

Ki jaka treikam bapher bapher ia kiba la aijingmut ban pyndonkam ia kane ka App ki kynthup ia ki Tnad sorkar bad ki nongtrei kiba trei sha ki shnong ki thaw, ki Bank, NBFC, kompeni insurance bad ki nongai jingshakri telecom, ki nongtrei bylla bad ki trai jaka, hotel bad guest house, ki notary, ki nongiasaid ain bad ki nongpynshisha ia ki kot ki sla bad ki paidbah nongshong shnong na ka bynta ban pynshisha hi da lade ia u Aadhaar.

Lada jia ba don ka jingsuba ba la pyndonkam bakla ia u Aadhaar, la aijingmut ban pyntip sha ka UIDAI lyngba ka  [email protected] lane phone ha u nombor 1947, bad pyntip sha ka Ophis Commissioner lada suba ba don ka jingleh thok.