Kyntu ka FKJGP ia ka Sorkar ban shimkhia mardor halor ki jingduna hapoh Shillong Civil Hospital

Syllad | The Rising MeghalayaJanuary 14, 2025

Ka Federation of Khasi Jaintia and Garo People (FKJGP) ha ka 14 tarik Kyllalyngkot ka la dawa na ka sorkar ba kan shim mardor ia ki sienjam ban weng ia kiba bun ki jingduna hapoh Shillong Civil Hospital kiba la ktah jur ia ki paidbah khamtam ia kito kiba wan na ki longiing kiba duna ha ka ioh ka kot bad kiba shaniah pura ha kane ka jaka hospital ban ioh jingsumar.

Hadien ka jingiakynduh ia ka Medical Superintendent (MS) hadien ka jingioh jingujor na ki paidbah halor kane ka bynta, u president ka Seng u Bah Dundee C Khongsit haba kren sha ki lad pathai khubor u la pynpaw ka jingsngewkhia kaba jur halor kiba bun ki jingduna hapoh kane ka hospital.

“Ka jingpynioh ia ki lad jingsumar kiba biang ka ei ka hok jong uwei pa uwei u nongshong shnong ka Jylla. Kumta, ngi kyntu jur ia ka sorkar ba kan buh hakhmat eh ia ka tnad ka koit ka khiah namar ki jaka sumar ki bym biang ki ktah jur ia ki duk ki suk kiba shaniah tylli ha ki jaka sumar sorkar. Ngi dawa ruh na ka sorkar ba ka dei ban shim mardor ia ki sienjam ban weng ia kine ki jingeh na ka bynta ka bit ka biang bad jingmyntoi jong ki nongshong shnong ka jylla,” pynpaw u Bah Dundee.

U president ka FKJGP u pyntip ruh ba ha kane ka jingiakynduh, ka Medical Superintendent ka la pyntip ba ki bor pyniaid jong ka hospital ki la dep ban wanrah ia ka mashin MRI naduh u snem 2018. Hynrei, haduh mynta ym pat shym la lah satia ban pyntrekam ia ka.

“Na ka jingkren jong ka MS ngim sngew lah mutdur ba lada kum kine ki machine kiba donkam kim don ha ka Civil Hospital kaba don ha ka nongbah ka Jylla, kaei ka jait jingshakri ha ka liang ka koit ka khiah kaba ngi khmih lynti ha ki thain nongkyndong jong ka jylla,” u la ong.

Nalor kata u la ong ruh ba na ka liang ka MS ka la pyntip ba hadien ba la pynkynriah noh ia i Pathologist sha Ganesh Das Hospital ym shym la shimkhia ban thung bujli hapoh Civil Hospital bad dei na kata ka dawa ba ym shym la lah ban leh ia ki test Pathology ha kane ka jaka sumar.

“Ka MS ka la kdew ruh ia ka jingduna ki nongtrei kum ka daw jong ka jingbym lah jong ka hospital ban pynbit pynbiang ia ki jingujor kiba man ka sngi na ki paidbah lyngba ki synduk jingujor ne ki complain box,” u la bynrap shuh shuh.