Kyntu ka Congress ia ka Sorkar ban pynkloi ia ka jingker sainar ha ki jaka khappud ka Bangladesh

Syllad | The Rising MeghalayaMay 9, 2025

Ka liang pyrshah Congress haka sngi Palei ka la pynpaw halor ka jingdonkam ba ka sorkar ka dei ban pynkloi ha kaba iadei bad ka jingker sainar ha ki jaka khappud jong ka India bad Bangladesh.

“Ka Meghalaya ka donkam ban pynkhlain ia ki jaka khappud jong ka. Ki BSF ki la shimkhia halor kane bad nga tharai ki bor shipai ki tip bha, bad nga tharai ruh ba ka la don ka jingiakren ba ka dei ban don ka jingker sainar ha khappud bad kaba dei ban pynkloi halor ka nongrim ba ngim don ia ki para marjan kiba biang. Kumta ka long kaba ma shibun bad ngi dei ban shimkhia ia kane,” ong u Secretary ka MPCC u Bah Manuel Badwar haba kren sha ki lad pathai khubor.

Haba kylli, u Bah Badwar u la ong, “Ngam iohi ba ka sain pyrthei jong ka jingiadei kan kylla than lait noh tang ka jingshisha ba wat ka Bangladesh ruh ha nga ka la nangkylla long kaba sniew, kumta haba phi don ia ka ri kaba sniew ka bym don ia ka rukom synshar kaba biang, kin pynmih ia ki jingkren mon kiba laitphew jait bad ngi la iohsngew ia ki jait jingkren kiba la pynmih da ki katto katne ki riewkhmat ka Bangladesh bad ia kiba ym dei ban shim sting namar ki dei kiba la shah bei tyngka bad lehse ka don ka jingthmu kaba sha lyndet ba ki kwah ban kyntiew ia ka ioh ka kot da kaba pan ia ka jingiarap na ka China, bad ngi kum ka jylla ngi ieng skhem ba ngim dei ban ailad ia kum kine ki kam pyrshah ri ba kin wan jia bad watla ki pynmih ia ki jingkynthoh bapher bapher ngim dei satia ban shim sting.”

Ha kaba iadei bad ka jingiakynad bad ki jingjia hapdeng ka India bad ka Pakistan, une u nongialam ka Congress u la ong ba ka ri baroh kawei kan hap ban ieng tylli kawei ban ai jingkyrshan ia ka sorkar bad ia ki shipai jong ka ri.

“Ka project Sindoor kum ka kyrteng ka pynpaw kum ka kyrteng hadien ka jingjia shah pyniap khamtam eh ki shikurim kiba dang shu pyndep ia ki jingiathoh shongkurim.Nga tharai ka ri baroh kawei ka dei ban ia don ryngkat lang bad ka sorkar, bad ka ri, ki paidbah bad ma ngi kum ka ri ngi dang dei ban kylla long ka ri ka ban wan ha ka kyrdan kaba lai ha ka jingkiew ha ka liang ka ioh ka kot ha ka pyrthei. Ngim dei shuh kiba rit,” u la ong.

“Shaei ka Pakistan? Ka Pakistan kam don hangno hangno ruh, kumta balei ngim lah ban ieng tylli kawei bad ngi hap ban iakhun, ngi hap ban pyni sha ka pyrthei ba ngi ieng ha ka nongrim. Ngim dei ban shah banbor. Kane ka thma kaba la sdang da ka Pakistan khamtam ha u pud u sam jong ka INdia ym dei ban ailad da lei lei ruh bad da kano kano ka sorkar lane da kino kino lane da ki nong India. Ngi baroh ngi dei ki nong India bad ngi dei ban ieng tylli kawei,” u la bynrap shuh shuh.