Kyntu iaki SMC ban ai dud iaki khynnah skul haka por ba ai ja sngi

Syllad | The Rising MeghalayaNovember 10, 2023

Ka Animal Husbandry and Veterinary Department, Directorate of Dairy Development, West Jaintia Hills haka 9 tarik Naiwieng ka la pynlong iaka jingai jinghikai halor ka jingkongsan ka dud kum shibynta ka jingrakhe iaka National Milk Day ka ban long haka 26 tarik une bnai.

Iaka jingai jinghikai la pynlong ha Iungwalieh ka Chilliangraij haka jingwan iashim bynta ki khynnah skul ryngkat ki nonghikai ka Chilliangraij Govt. LPS, Chilliangraij SSA UPS, Loompyrdi Iongpiah UPS SSA, Pohmusiang UPS SSA bad ka Panaliar UPS SSA.

Ki riew shemphang kiba la wan ban ai jingbatai shaphang ka jingmyntoi jong ka dud ki long ka Kong Mebel Shylla, Senior Dairy Officer, Animal Husbandry and Veterinary Department, Directorate of Dairy Development, West Jaintia Hills bad u Bah E Wann, Dairy Technology, Directorate of Dairy Development, West Jaintia Hills.

Ka Kong Mebel Shylla ka la kyntu iaki School Managing Committee ba haba ai ja sngi (Midday Meal) iaki khynnah dei ban ai lang teng teng bad ka dud khnang ba ki khynnah kin ioh iaki symboh jingbam kiba tei kiba la tip kum ka Nutrient bad Vitamin. Na ka liang jong ka ruh ka la kular ban ai iaka dor kum ba ai sha ki distributor sha manla ki skul kiba kloi ban ai dud iaki khynnah.

Haba kut ka jingialang la ioh ki kyntien khublei na u Oriland Shylla, General Secretary Chnong Chilliangraij, Jowai bad iaka jingialang la pynwai da kaba sam dud ei sha baroh ki khynnah skul bad nonghikai.