Kyntait u Myntri ia ka jingkynnoh ba ka MEG kan aiti ia ki skul/college sha ki riew shimet

U Myntri ka Tnad pule puthi ka Jylla u Rakkam A Sangma u la kyntait ia ki jingkynnoh ba ka Meghalaya Education Grant (MEG) ka thmu ban aiti pyniaid noh ia ki skul bad ki college sha ki riew shimet.
U la kynnoh ruh ia ka Voice of the People Party (VPP) halor ka jingkren khlieh khlieh tdong tdong halor kane ka phang.
“Nga kwah ba ka VPP ka dei ban wan shakhmat ban iakren bad nga lane bad ki ophisar jong ngi ban tip naduh tyllong halor ka jingthmu jong ka MEG. Balei ki kylla khlieh khlieh tdong tdong ia kaei kaba ki kren? Hynnin, ki juh ki briew ki ong ba ka sorkar kam shym la leh ei ei ban kyntiew ia ki jaka pule puthi bad pynbeit ia baroh ki jingeh. Namar ka jingtip ia baroh ki jingeh jingtynjuh ka sorkar ka la wanrah ia ki katto katne ki sienjam bad ki policy. Ha ka sngi kaba bud ki juh ki briew ki ong ba ka sorkar kan sa aiti pyniaid noh sha ki riew shimet,” ong u Rakkam haba kren sha ki lad pathai khubor haka 21 tarik Naitung haba kynthoh halor ka jingkren ba dang shen jong u nongaiktien ka VPP u Bah Batskhem Myrboh.
U Sangma u la batai ba ki sienjam ba la shim da ka sorkar ka thmu ban pynbeit ryntih halor ka rukom pyniaid ia ka pule puthi da kaba pynduna ia ka jingdon bun kyrdan ha ki skul bad ki nonghikai na ka 14 sha ka 3; ki skul ba pyniaid da ka sorkar, ki skul ba ioh jingiarap ne grant in aid bad ki skul shimet.

Katkum ka jingong jong u, kane ka jingtyrwa ka thmu ban pyniaid noh da ka sorkar ia ki jaka pule deficit ha kaba na ka liang ka sorkar hi ka la siew ia ki tulop jong ki kam ba la mang ne sanction post.
U Myntri u la ai nuksa ruh ia ki college ba pawkmat kum ka St Edmunds bad St Anthony’s kiba la ioh shibun ka jingkyrshan na ka sorkar halor ka jingsiew tulop.
U la ong ba ka sorkar ka kwah ban shimti hi noh bad ban pyniaid hi da lade ia kine ki jaka pule ha ka jaka ban ai pyniaid ia ki sha ki riew shimet.
“Namar kata, ka sorkar kan dang sdang ia ki sienjam. Ngi dang don ha ka kyrdan jingiakren. Ngi dang pynlong ia ka jingiakren bad baroh ki jaka pule deficit namar ia ki kam la mang da ka sorkar bad ia ki tulop jong ki nonghikai la siew da ka sorkar,” ong u Rakkam haba bynrap “Kumta ka sorkar ka la ai jingmut sha ki la kin shah ne em ia ngi ban shimti ia ki jaka pule ki jong ki. Lada ki mynjur, ka sorkar ka kwah ban shimti. Kata ka mut ha ka jaka ban pynlong ki jaka pule shimet ka sorkar kan shimti ban pyniaid ia ki.”
Nalor kata u Myntri u la pynpaw ruh ba la thaw ia ka Committee ka ban iakynduh ia ki kynhun bapher bapher kumjuh ki Managing Committee jong ki skul ban iakren halor kane ka jingtyrwa.
Watla katta u la pynpaw ba ki jaka pule kiba heh kum ka St. Edmunds bad St. Anthony’s College ki lah ban ym mynjur ban ai pyniaid sha ka sorkar. Katkum ka jingong jong u, ka sorkar ka la ai ka jingkyrshan pisa kaba kot haduh T.23 klur sha kine ki artylli ki college na ka bynta ban siew tulop sha ki nonghikai (70-80 ha St Edmunds bad 100 tam ha St. Anthony’s).
Haba kylli, u Myntri u la ban jur ba ka rai ban aiti pyniaid sha ka sorkar ia ki jaka pule kan shong ha ka jingshim rai da ki jaka pule.

Leave a Reply