Kyntait ka Iingdorbar ia ka jingkyrpad kyntiew sngi shong dorbar ka VPP

Syllad | The Rising MeghalayaAugust 23, 2024

Ka Iingdorbar Thaw ain ka ka la kyntait ia ka Amendment motion ba la wanrah da ka Voice of the People Party (VPP) na ka bynta ban kyntiew ia ki sngi shong dorbar Synrai ba la buh da ka Business Advisory Committee (BAC).   

“Kiba pyrshah (No’s) ki la jop bad ia ka Amendment of motion la kyntait da ka Iingdorbar,” ong u Lamphang ka Iingdorbar u Thomas A Sangma hadien ka jingiavote ia ka motion ha ka jingpynlong ia ka Dorbar Synrai ha ka 23 tarik Nailar.

Hashwa ban rah ia ka motion ha ka jingiavote, u Lamphang u la pynthikna sha u dkhot ba u lah ban pynjlan ia ka por lada donkam, hynrei ym ia ki sngi shong dorbar. “Nga ai ka jingkular ba lada ka mih ka jingdonkam ngan sa pynjlan ia ka por hynrei ym ia ki sngi shong dorbar,”ula ong.

Hynrei, wat hadien ka jingkyrpad da u Lamphang ban weng noh ia ka motion, u MLA ka VPP ka North Shillong u Bah Adelbert Nongrum u la ong, “Nga burom ia ka jingkyrpad jong phi, hynrei Ngan ym weng ia ka amendment motion.”

Haba rah ia ka motion u Bah Adelbert u la ong ba ka jingpynlong dorbar kaba tang san sngi, bad tang ar sngi ka jingai iakren halor ki kam shimet jong ki MLA ka dang lyngkot palat ia ka Iingdorbar ban pynioh ia ka jingleh hok halor kiba bun ki kam kiba kongsan jong ka Jylla kiba donkam kyrkieh ban iakren hapoh ka Iingdorbar kaba iakynduh tang arsien shi snem.

Haba ai jubab, u Symbud Myntri Rangbah uba khmih ia ka Parliamentary Affairs u Bah Prestone Tynsong u la ong ba ka BAC ka la dep ban iakren bniah halor baroh ki kam bad ha ka Dorbar Synrai kaba la dep ruh la buh san sngi na ka bynta ban shong dorbar.

“Ha ka jingialang jong ka BAC na ka liang ka Sorkar ngi la ong ba ngi donkam tang lai sngi, hadien ngi la ong ba ka biang na ka bynta ki kam shimet jong ki dkhot ha kaba ngi la ioh sa ar sngi. Nalor kata ngi la dep rai ruh ba lada ngi donkam ngin pynjlan sa kumba shikynta haduh lai kynta, bad ngi la tyrwa bad mynjur ia kane, bad Nga kyrpad ia ka Iingdorbar ba kan pdiang ia ka jingpynbeit,” u la ong haba pynthikna ba ia ki mat ba la wanrah da u dkhot yn sa iakren ha ka jingialang ka ban wan jong ka BAC.