Kyntait ka Agatha ia ki khubor hamsaia ba kan dei ka kyrtong na ka bynta ka MP Rajya Sabha

Syllad | The Rising MeghalayaJuly 17, 2025

Ka MP barim ka Tura ka Agatha K Sangma ka la kyntait ia ki khubor hamsaia ba ka lah ban dei ka kyrtong na ka bynta ka shuki MP Rajya Sabha ka Jylla, da kaba pynpaw ba kam shym la don satia kano kano ka jingiakren hapoh ka National People’s Party (NPP) ha kaba iadei bad ka jinglong kyrtong ka jong ka.

Nalor kata ka la ban jur ruh halor ka jingkut jingmut jong ka ban kyrshan pura ia ka rai jong ka party la kalong kumno kumno ruh.

“Kumba ka long mynta, ngim pat don satia ia kano kano ka jingiakren ha kaba iadei bad ka shuki Rajya Sabha. Kine ki dei tang ki jingmutdur. Kumta, ngam lah ban ong ei ei halor kane. Kaei kaba nga lah ban ong ka long katba ka party ka rai nga ai ka jingkyrshan kaba pura ia u ne kata ka kyrtong,” ong ka Agatha haba kren sha ki nongthoh khubor haka sngi Balang.

Haba kylla la kan pdiang ne em lada kan shah jied kum ka kyrtong, ka Agatha ka la bynrap da kaba ong ka dei ka rai jong ka party bad kan kyrshan ia kata.

“Kumba nga ong, ia mynta ngim pat iakren ei ei halor kane ka kam. Lehse ha ha ki sngi ki ban wan lada ka don ka jingiakren ngan sa pyntip sha phi. Ngam nang ban ong ia mynta hi namar kumba nga la pynpaw ka dei ka rai jong ka party ym ka jong nga bad ngan shu kyrshan ia ka party,” ka la iai ban.