Kynnoh u MP ka Congress ba pynbor ka BJP ia ka NPP ban phla sha ki paidbah ba ki dei ka juh

Syllad | The Rising MeghalayaApril 6, 2024

U MP ka Seng Congress u Bah Vincent H Pala haka 4 tarik Iaiong, u la ong ba ka Seng Bharatiya Janata Party (BJP) ka la pynbor ia ka National People’s Party (NPP) ba kan phla sha ki paidbah ka Jylla ba ki dei ka juh.

“Ka BJP ka la pynbor ia ki ba kin phla sha ki paidbah ka Meghalaya. Ka BJP ka kwah ban tip ia ka jingsngew bad ia ka bor jong ki paidbah nongshong shnong ka Meghalaya,” ong u Bah Pala sha ki lad pathai khubor hadien ka jingialang ialap ilekshon ha Iawmusiang, Jowai, West Jaintia Hills.

Ia kane u Pala u la kdew halor ka jingkren ba dan shen jong u Myntri Rangbah ka Jylla u Conrad K Sangma uba la ong ba lada ki paidbah ki dang kwah ia u Myntri Rangbahduh Narendra Modi ba un wanphai ha ka bor ki dei ban vote ia ka NPP.

U Pala u la ong ba kane ka jingkren jong u CM ka la pynpaw shai kdar ia kata ka jingiahapdeng ka BJP bad ka NPP.

“Ha ka ilekshon ba la dep ki la ong ba kam don kano kano ka jingiadei hapdeng ka NPP bad ka BJP, hynrei mynta la pynpaw paidbah ia kane ka jingiadei jong ki.Na ka liang ka Kong Ampareen ka la dep pynpaw naduh kaba sdang ba ka la don lang na ka bynta ban pyniajan hapdeng ka Delhi bad ka Meghalaya lyngba ka BJP. Dei na kata ka daw mynta la pynpaw pyrthei ia kane ka jingiadei jong ki hashwa ba kin pyrshang ban buhrieh,” ong u Bah Pala.

U la ong ruh ba mynta ka la dei ka pali ia ka Congress ban pynpaw ia ka jingkhlain ka jong ka bad ia ka jingiatylli.

Ha kaba iadei bad ka jingong jong u nongaiktien ka NPP u Bah HM Shangpliang ba ka jingai vote ia ka Congress ka long kuma shong ha ka lieng kaba ngam, une u nongialam Congress u la ong, “U Bah Shangpliang u long uta uba ngi ong, ha Jowai phi bam na kajuh ka miej, hynrei hadien ba phi la kdang kumta ruh phi kawang da kajuh ka pliang ha Jowai.”

“Kiba bun na kine ki kyrtong ki long kumta, ki don bad ngi bad ki ialehkmen bad trei na ka bynta ka jingbha jong ka Congress, hynrei kaba ki la poi sha kawei ka kyrdan ki pyrshang ban pynjot pynpra ia la ka jong ka dur.Kumta kat kaba u kren Nga tharai ka phalang sha lade,” u la bynta shuh shuh.