Kynnoh u MP Congress na Shillong ba pulom ka sorkar MDA ha baroh ki liang

Syllad | The Rising MeghalayaJanuary 10, 2024

U MP ka Shillong, u Bah Vincent H Pala haka 9 atrik Kyllalyngkot u la ong ba ka jingtreikam jong ka sorkar MDA ba la lamkhmat da ka National People’s Party (NPP) ka la pulom ha baroh ki liang.

Haba kren sha ki lad pathai khubor, u Bah Pala u la ong, “La ka dei ka MDA-I lane ka MDA-2, Nga kren shai halor ka jingkular ka jong ki na ka bynta ban ioh kam ia 5 lak ngut ki nongshong shnong, hynrei nga tharai ba wat tang hapoh ka 1 lak ruh kam shym la urlong satia. La kumno kumno lada phi pyniaphiah ne divide ia katei ka 5 lak da ki 5 snem haduh katno kiba la ioh kam, nod. Ki la kular halor ka kam dewiong ha ki mat treikam jong ki, kane ruh nod. Ki la pynbna paidbah ba ki la pynioh ia ki laisen tih par, hynrei kane ruh nod. Pynban ki la pynioh ia ngi da kiba bun bah ki coke plants kaba la kylla long pynban ka bih na ka bynta ki nongshong shnong, bad lyngba kine ki coke plant ki nongshong shnong mynta ki la sakhi ia ka tamasa Sohniamtra (Orange Festival) khlem da don Sohniamtra. Mynta ki nongshong shnong ki la sakhi ia ka tamasa Sohtrun khlem da don Sohtrun.”

“Ka jingshim ia ki rai ka long beit tang na ka bynta ka pisa bad ka jinglalot, ki la pynjulor ia ka thain West Khasi Hills, ka thain Jaintia Hills bad ia baroh ki thain khappud. Nga tharai ka sorkar MDA ka la pulom ha baroh ki liang. Ym don iwei ruh ki ban kmen, ym tang na ka bynta kine ki shiphew bnai kiba la leit noh, hynrei ruh na ka bynta ki san snem kiba la leit noh kumjuh,” u la ong shuh shuh.

Ha kawei pat ka bynta, u Bah Pala u la ong ba ka jinglong ne ka ego kaba don ha ki nongialam ka party ka la pynlong ia ka party synshar National People’s Party (NPP) ba kan ioh lad biang ha ka sien kaba ar ban thaw ia ka sorkar ha Meghalaya.

“Hynrei, kumno re namar ka jingthylli hapdeng ki nongialam, namar ka ego ki nongialam na ka Congress, ki (NPP) kila ioh lad biang ha ka sien kaba ar ban thaw ia ka sorkar,” ong shuh shuh u Pala lyngba ki lad pathai khubor.

Ha kawei pat k bynta u Bah Pala u la pynpaw ia ka jingsngew skhem ba ki paidbah ka jylla Meghalaya kin pyrkhat thymmai namar kane ka jingpulom jong ka sorkar MDA ba la lamkhmat da ka NPP.

Shuh shuh u la ong ruh ba ki paidbah khlem artatien kin pyrkhat arsien naduh kane hi ka MP Lok Sabha ilekshon ka ban wan.