Kynnoh u MDC ka BJP ba thmu ka NPP ban pynduh pyndam ia ki District Council ha Meghalaya

Syllad | The Rising MeghalayaJuly 20, 2025

U MDC ka BJP na Tura u Bernard N Marak u la kynnoh ia ka Executive Committee ba la ialam da ka National People’s Party (NPP) halor ka jingpyrshang ban pynjot pynpra ia ka Garo Hills Autonomous District Council (GHADC).

U Marak u la kam ruh ba ka jingeh kaba iakynduh ka dei ka bynta jong ka jingiasylla sain pyrthei kaba kham heh kaba thmu ban pynduh pyndam ia ki District Council hapoh Meghalaya.

“Kawei na ki jingangnud jong uwei u riewsain pyrthei ba la rim ka Rilum Garo ka long ban pynduh pyndam ia ki District Council ha Meghalaya, bad ka jingeh ha GHADC ka dei ka bynta jong katei ka jingiasylla sain pyrthei, ha kaba ki don katto katne ki MDC ka Liang Synshar ha Rilum Garo kiba kwah ban pynduh pyndam noh ia ka GHADC. Ia kane ka juh ka jingsngew la pynpaw ruh da ki katto katne ki MDC Liang Synshar sha ki nongtrei bad wat sha ki para MDC ha kaba ki la kdew shai ba ka GHADC kan sa khangdam noh,” ong u MDC ka BJP lyngba u kyrwoh haka 20 tarik Naitung.

U la kynnoh ruh ba ka jingbym siew ia ka tulop mynta lah 42 bnai ka dei ka jingpyrshang borbah kaba thmu ban pyni ba ka GHADC kum kaba bamsap, ka bym lah treikam bad ka jingpynkylla dur ia ka mat sain pyrthei.

“Ka jngbym lah ban siew tulop ka la ktah jur ia ka jingim jong ki hajar ngut, kynthup ia ki longiing longsem jong ki MDC ki bym don ha ka Liang Synshar. Wat hadien ka jingrah kaba bun bunsien ia kane ka mat bad ka jingsngewkhia ba la pynpaw halor ki jingpyndonkam bakla ia ka pisa, ka jingduh ia ka khajna bad ka jingpynkylla ia ki tnad ba pynmih pisa sha ka jylla, hynrei na ka liang ki Execrutive Member ki la pulom ban rah ia kine ki mat wat hadien ki jingmaham kiba bun bunsien,” ong u Bernard.

Nalor kata une u MDC ka BJP u la kynnoh ruh ba wat hapdeng ka jingioh kaba da ki klur tyngka na ka Sorkar Pdeng bad nalor ka pisa jong ka Council, hynrei haduh 40% na kane ka pisa ka la jah rngai noh, kata lehse namar ka jingpyndonkam bakla.

Da kaba kynnoh ia ki MDC ka Liang Synshar kiba don ia ka mynsiem sarong bad ka jingleh meng bad ki bym lah ban leh ei ei halor kane ka jingeh kaba mynta, u Marak u la kyntu ia ki paidbah ka Rilum Garo ba kin bishar bniah ia ka jinglong jingman, da kaba maham ba ka Council ym tang ba ka la pulom hynrei ka la don ha ka jingpyrshang ban pynjot pynpra ia ka.

“Ka jingpulom jong ki MDC ka Liang Synshar ka dei ban long kum ka jingkyrsiew thiah ia ki nongshong shnong ka Rilum Garo, namar ka Council ym tang ba ka la pulom ne iap, hynrei ka don ha ka jingthmu ban pynjot pynpra syndon ia ka,” u la bynrap.