Kynnoh u Dr Mukul ba ialam bakla ka Sorkar lyngba ka project lynti rel ha Rilum Khasi Jaintia

Syllad | The Rising MeghalayaMay 24, 2025

U Nongialam ka Liang Pyrshah u Dr Mukul Sangma u la kynnoh ia ka sorkar ba la ialam da ka NPP halor ka jingialam bakla ha kaba iadei bad ka jingtrwa ban pyntreikam ia ka project lynti rel ha Rilum Khasi bad Jaintia.

“Ki la shukor. Ngi don ha ka jingklumar namar ka sorkar ka bym larkam,” ong u Mukul haba kren sha ki lad pathai khubor haka sngi Thohdieng.

Ia kane u la pynpaw haba jubab ia ka jingkylli la ka jingpyrshang jong ka sorkar ban khot ia ka jingialang jong ka All Party Committee ka dei tang ka jingpyrshang kaba pulom namar ki kynhun sengbhalang ki la ieng skhem ba kin ym ailad ban pyntreikam ia ki project lynti rel khlem da don shwa ia ki lad jingiada kiba biang kum ka Inner Line Permit (ILP) ban khanglad ia ka jingwan rung kyrthep ki briew kiba na bar.

U la pynkynmaw da kaba ong, “Lada ha kaba kum kata ka por baroh ki sengbhalang ki la ailad ia ngi ban iaid shakhmat ia kane ki project ka jingpyntreikam kan jin da la dep. Hynrei hato ngi la pynbor ban pyntreikam ia ka? Em, ngim shym la pynbor. Ha ka jingshisha la pyndep ia ka jingleh sorbe haduh ha Shillong. Ka jingtyrwa ban buh ia ka railway station ha ka nongbah Shillong ruh la pyndep.”

Da kaba shim ia ka jingpyrshah ia ki project lynti rel ha ka thain kum ka jingduna ia ka jingshaniah ia ka sorkar, une u Myntri Rangbah barim u la ong, kane ka long namar ka sorkar kam shym la lah ban pyni ia kano kano ka jingleh kaba lah ban pynioh ia ka jingshaniah hapdeng ki nongshong shnong bad kin dang don bun ki jingjia ki ban nangpynmih shuh shuh ia ka jingduh jingshaniah.”

“Dei namar kane ka jingduh jingshaniah kaba la pynlong ia ki nongshong shnong ha Khasi Hills ba kin kyntait ban jied ia ki dkhot sha ka KHADC. Ka rukom kaba ki lah ban jop ha Rilum Jaintia da kaba burom ia ka JHADC ka dei la kumno kumno kaba hap ban bishar bniah,” u la ong.

Haba kylli halor ka jingieng jong ka TMC hadien ka jingshim rai jong ka liang pyrshah Congress bad ka VPP ban kyntait ia ka jingialang jong ka All Party Committee ban iakren halor ka lynti rel, u Mukul u la ong, “Nga dang peit bniah ruh ia kane ka jinglong jingman baroh.”

U la ong ruh baroh ki kynhun sengbhalang bapher bapher ki la ieng pyrshah ia ka jingthmu ban wanrah lynti rel namar ki daw kiba la dep ban kdew bad ban pynpaw sha ka sorkar.