Kynnoh thmu bat bor u bar jylla ïaka khynnah skul ha paiñkhana skul, mudui ejahar ka KSU

Syllad | The Rising MeghalayaOctober 1, 2019

JOWAI: Ka Khasi Students Union (KSU) kala mudui da ka ejahar pyrshah ïa u uwei u bar jylla uba la thmu ban bat bor ïa kawei ka khynnah skul kaba dang 9 snem ka rta ha kawei ka skul kaba don ha sor Jowai.

Une u bar jylla u dei uba kyrteng u Roshan Kumar, uba trei kum u nongshna light.

Kane ka jingjia kala jia haka sngi ba Ar haka por kumba 10 baje mynstep ha kaba katei ka khynnah kaba thmu ban leit painkhana kala shah patan jubor shapoh ka painkhana ha une u Roshan uba maramot ïaka light painkhana jong ka skul, hynrei donbok ba kam shym don kano ka jingjia kaba sngewsih ïa kane ka khynnah namar ka jingïakhun jong ki para khynnah skul ban pynlait ïaka na ka tyrsim une u runar.

Kine ki para khynnah skul kila pyrta jingiarap jong ki nonghikai bad la bat ia utei u Roshan.

Ka KSU Jowai Circle marsien tip ïa kane ka jingjia kala hiar wut wut sha katei ka skul hapoh ka jingïalam u Morningstar Pasi president KSU Jowai Circle, president KSU Jaiñtia Hills District u Ohibait bad kila ïohlad ruh ban ïakren bad u Principal jong ka skul. Une u principal ula ïathuh ba kane ka jingjia kala jia ha painkhana kaba une u bar jylla u shna iaka light bad ula pyntip sha ki bor Pulit kiba la wan ban kem ïa u mar mar.

Ka KSU kala mudui ruh da ka jingujor ejahar ha Jowai Police Station pyrshah ïa une u Roshan Kumar bad kala dawa ban pynshitom ïa u katkum ki kyndon jong ka aiñ.

Halor kane ka jingjia ka jingtohkit jong ki pulit kala iaid shakhmat.

Ka KSU kala pynpaw ba ïaka jingshna ïaka light ha katei ka skul la shim contract da u da uwei u trai jylla bad um ithuh ia u une u Roshan Kumar namar ba dei u head misteri uba dei u bar jylla u la ialam trei ia u ha kane ka skul bad kim don ruh ki kot ki sla kiba biang ban trei bylla.

Ka KSU kala maham ia baroh ki kontrak ba ki dei ban pynbiang iaki kot ki sla jong ki nongtrei jong ki bad lada kim lah ban pynbiang ka KSU kan shim iaki rai kiba tyngeh.