Kynnoh pynshitom ki Karbi sa iaki jingri jingdup ki Pnar ha Lapangap, rah jubor uwei u masi

Syllad | The Rising MeghalayaSeptember 2, 2025

Ka jingiakynad hapdeng ki Pnar bad ki Karbi haka thaiñ Lapangap-Tahpat ka dang tnem jur bad ka wanrah iaka jingbymshngain wat iaki jingri jingdup ha katei ka jaka khappud Assam bad Meghalaya

La kynnoh ba ki katto katne ngut ki briew ba na ka jaid bynriew Karbi kila sdang ban pynmynsaw wat iaki masi ba ri ki Pnar ha Lapangap da ka tar iaki da ki tiar ba nep bad beh ruh ia ki masi ba sharai sha ki lum ki wah sha ka liang ba sah ba shong ki Karbi.

U Waheh shnong Lapangap u Ma Deimonmi Lyngdoh haba pyntip ia kane ka jingjia, ula iathuh ba haka 28 tarik Nailar, katba ki khynnah na ka shnong Lapangap ki dang ai bam phlang iaki masi ha Lum Pynthor, la wan shi kynhun ki nong Karbi kiba la beh jubor ia uwei u masi u sha liang ka shnong Tahpat.

Ula ong ruh ba kiwei pat ki masi, kine ki nong Karbi kila tar bad ruid dusmon da ka tari iaki masi haduh ban da mynsaw.

Halor kane ka jingleh jong ki Karbi, ula pyntip ba naka liang ka shnong Lapangap kala dep ban pyntip sha ki bor pyniaid District jong ka West Jaintia Hills bad kila dep ruh ban iakren bad ki bor pyniaid shnong jong ki Karbi khnang ban pynphai ia utei u masi ba ki Karbi ki bat sah, hynrei haduh mynta ki khlem pynphai satia ia une u masi

Une u masi ba shah rah haki Karbi la dei trai da u Ma Karchom Siangshai.