Kynnoh ka VPP ba kput ka sorkar ia ka HITO namar ki kam ialap pyrshah ha ka ilekshon  ba la dep

Syllad | The Rising MeghalayaSeptember 6, 2023

Ka Seng Voice of the People Party (VPP) haka sngi ba Ar ka la kynnoh ba ka jingthombor naphang jong ki pulit pyrshah ia ka seng Hynniewtrep Integrated Territorial Organization (HITO) ka dei ka jingpynhiar kput sain hima namar kane ka kynhun ka la mih madan ban ialap pyrshah ia ka seng NPP khamtam ia u Symbud Myntri Rangbah u Bah Prestone Tynsong ha kane ka ilekshon MLA ba la dep.

Ka VPP ha u kyrwoh lyngba u nongaiktien jong ka u Dr Batskhem Myrboh ka la ong ruh ba ka jingpyntreikam ia ka section 171 bad 34 jong ka IPC bad section 105 jong ka Meghalaya Police Act, 2010 pyrshah ia ka seng HITO ka pynpaw halor ka jingpyndonkam bakla jong ka tnat pulit ia ka bor.

Da kaba pynrem jur ia ka rukom treikam jong ka Tnat Kam Pohiing (Police) hapoh ka jingkhmih jong u Bah Prestone Tynsong, u Dr Myrboh u la ong ba ka party VPP ka pynrem jur ia kito ki pulit kiba donkti ha kaba pyndonkam bor pyrshah ia ki riew paidbah ba lui lui ha katei ka jingjia kaba la jia ha ka 4 tarik mynta u bnai, kata ha ka por ka jingiaid paidbah jong ka seng HITO kaba la pynthut shibun ia ki riew paidbah kiba la ngat ha ka jinglehbor jong ki pulit kiba la bom lathi naphang ha ryngkat ka jingpyndonkam da ki lyer pynsat khmat ne tear gas.

“Ka jinglehbor jong ka tnat pulit hapoh ka shnong Thangskai, EJH bad ha kane ka jingjia ha ka nongbah Shillong ka pyni ia ka jingtlot jong ki pulit ka jylla ha kaba kim shym la lah ban tehlakam wat ia ka jingiakhih kaba rit,” ong u nongaiktien ka VPP.

Kumta ruh ka seng VPP ka dawa jur ban shim ka jingpynshitom pyrshah ia kito ki heh pulit kiba don bynta ha katei ka jingjia namar ka jingshim rai kaba lam sha ka jingleh donbor jong ki pulit nalor kiwei pat ki jingpynkhein ia ki kyndon kynthup ia ka jingpyndonkam da ki ktien khlem akor ia ki paidbah khlem jingsalia.

Shuh shuh u la ong ruh ba kito kiba la ngat ha ka jingduh nong lyngba kane ka jinglehbor jong ki pulit ki dei ban ioh ia ka bai lutksan na ka sorkar.

Ha kawei pat ka bynta ka Seng VPP ka dawa na u Symbud Myntri Rangbah ba u dei ban shim ia ka jingkitkhlieh bad ban pynthikna ba ka tnat jong u kan pyntreikam da ki sienjam kiba katkum ka ain bad ha kata ka lynti jong ka synshar paidbah.