Kynnoh ka VPP ba bhah ka tnat GAD iaka mala ba sha trai ka Meghalaya House, Kolkata sha u para u Dy CM

Syllad | The Rising MeghalayaAugust 18, 2023

Ka Voice of the People Party (VPP) haka sngi Palei kala buh jingkylli ha kaba iadei bad ka jingkynnoh shim rai jong ka tnat General Administration Department (GAD) ka sorkar jylla na ka bynta ban bhah ia ka mala ba shatrai (ground floor) jong ka Meghalaya House, Kolkata sha u para jong u Myntri ka cabinet u  Rocky Dhar na ka bynta ban pyniaid ia ki kam khaii pateng.

Na ka liang u General Secretary ka VPP u Dr Ricky AJ Syngkon u la ong ba ka VPP ka kyndit bad lyngngoh jur halor kane ka rai jong ka tnat GAD ka sorkar jylla ban bhah ia ka mala ba shapoh jong kane ka Commercial Complex, Meghalaya House kaba don ha  Russell Street, Kolkata sha u briew uba la tip kyrteng kum u M/S Rocky Dhar, Nongmynsong, Umkdait Block –III, Shillong -793019 na ka bynta ki kam khaii pateng.

Lah ban kdew bad u Rocky Dhar u dei u para jong u Symbud Myntri Rangbah ka jylla u Sniawbhalang Dhar.

Utei u heh ka VPP u la ong ruh kaba pynlyngngoh shuh shuh ka long ban tip ba ia katei ka mala ba shatrai mynta la pyndap da laitylli ki tnat sorkar bad corporation, kata ka Tourist Information Centre kaba hap hapoh ka Directorate of Tourism, Directorate of Horticulture bad ka  Meghalaya Handloom and Handicrafts Development Corporation Ltd – Government State Emporium.

La ong ba ia baroh kine ki unit/outlet hapoh ki departments/corporation bapher bapher la buh ha kane ka jaka khnang ban kyntiew ia ki mar bad ki jingtreikam jong kine ki tnat bapher bapher, kata na ka bynta ki kam khaii pateng.

Kumta ruh na ka liang u Dr Syngkon u la pynpaw da kaba ong; “Ngim lah ban sngewthuh kumno ba ka sorkar kaba dei ban ai ka jingshakri ia u paidbah lyngba ki tnat treikam bapher bapher mynta kan kyntiew ia ki kam shimet ha ka jaka jong ki paidbah ia kiba ka dei ban ai jingshakri.”

Nalor kata u la kynnoh ruh ba kane ka jingleh ka sorkar ka dei ka jingthmu ban pynioh nong ia ki katto katne ki riew shimet ym ia ki paidbah kiba la kyrshan ia ki na ka bynta ban ai ka jingshakri.

Shuh shuh u la ong ruh ba la sngewthuh ba hadien laitylli ki jingpyrshang, ka sorkar ha kaba khatduh ka la pynkhamti ia ka tender sha u M/S Rocky Dhar, bad kane ka dawa ruh ia ka sorkar ba kan pynshai kumno la wanrah ia ki jingkylla ha kaba iadei bad ki kyndon ia kiba mynta la pynkhamti sha u nongkhaii shimet ne jaka khaii ban pynthikna ba un ioh ia kane ka jaka hapoh hapoh Meghalaya House.