Kynnoh ka JNC ba ai Land Holding ka JHADC iaka jaka ba heh 21 lak square meter ha Elaka Sutnga khlem leh sorjamin

Syllad | The Rising MeghalayaFebruary 7, 2024

Ka Jaintia National Council (JNC) haka 7 tarik Rymphang ka la ujor sha u CEM jong ka JHADC bad kynnoh ba ai Land Holding Certificate (LHC) iaka jaka kaba heh 21 lak Square meter tam kaba hap hapoh ka Elaka Sutnga, East Jaintia Hills District khlem leh kano kano sorjamin (survey).

U president JNC central body, u Sambormi Lyngdoh haba kren bad ki lad pathai khubor ula ong ba ka seng ka la ioh pdiang iaki jingujor na ki nongshong Shnong jong ka Elaka Sutnga ha kaba la don ki briew kiba register ia kawei ka jaka kaba heh haduh 21 lak square meter tam kaba kynjoh shaka 215 Hectare.

Ula ong katkum ka jingtip jong ka seng, ka JHADC ka lah ban issue Land Holding tang kumba 1 lak square meter ia kawei ka Land Holding, hynrei kala pynlyngoh pat ia ka seng ka long ba kumno ki EM kiba dei peit ia kane ka kam, ki nud ban issue iaka land holding haduh 21 lak square meter khlem da leh iaka ground survey ne sorjamin iaka jaka.

“Ka seng ka la dawa na u CEM ban pynsangeh shwa iaka land holding bad ban pynlong shwa iaka ground survey khnang ba u paidbah kiba don jaka hapoh katei ka 21 lak square meter kin ioh iaka hok ka jong ki bad dawa ruh ban thung da ka Survey Committee,” la ong u Sambormi bad ula byrthen ba lada ka konsil kam shimkhia na ka liang ka JNC kan ujor da ka PIL.