Kynnoh ka HNLC ba pyndonkam ka tnad pulit da ki riew lui lui kum ki atiar ban pynphriang khubor

Syllad | The Rising MeghalayaJune 28, 2025

Ka Hynniewtrep National Liberation Council (HNLC) ka la kynnoh ia ka tnad pulit ka Meghalaya Police ba ka la pyndonkam da ki briew kiba lui lui kum ki atiar ban pynphriang khubor na ka bynta jong ka. 

Lyngba u kyrwoh u General Secretary ka HNLC u Bah Sainkupar Nongtraw u la dawa na ka Tnad Pulit ba ka dei ban sangeh shisyndon ia kiba kum kine ki jingpyrshang, da kaba kdew halor ka jingwan pyndem ba dang shen jong ki arngut ki dkhot ka HNLC kiba la kam ba ki la shah ialam bakla ha u Samuel Wahlang Pahsyntiew.

U Nongtraw u la kynnoh ba ka jingtohkit jong ki pulit halor ka jingjia bthei bom IED ha u bnai Lber 2024 ha Them Iew Mawlong ka dei ka kam shu thaw bad ka jingpyrshang borbah ban pyni ia ka jingmih bad ym ban wad ia ka jingshisha.

“Ha kaba nyngkong ki pulit ki la kem ia u Tarzan Lymba da kaba kynnoh ba u dei uba donkti ha kane ka jingpynbthei bom. Mynta, hadien ka jingkam ia ki arngut kum ki lehnoh kiba la wan pyndem, ki la kdew kti sa shawei pat, kata ka jingkynnoh ka la kynriah sha u Samuel Pahsyntiew,” u la ong.

U la ong ruh ba kane ka jingkylla jngmut kaba kynsan ka pynpaw ia kane ka jingtohkit kum ka kamkai bad ka jingpyrshang borbah ban pyni ia ka jingmih bad ym ban wad ia ka jingshisha, kata da kaba kynnoh ruh ba kine ki jingkem beain bad ki jingkynnoh kiba phaikhmat shawei pat ki pynshisha ia kawei ka jingshisha ka bym artatien; ‘Ka Tnad syntiat ki pulit ka Meghalaya ki la pulom lut.’

“Ha ka jaka ban pdiang ia ka jingshisha bad ban pynpaw ia ka tyllong jong ka jingjia, ki la tan pynban ia ki riew paidbah ba lui lui sha phatok bad pyndonkam ia ki kum ki atiar ban pynphriang khubor hakhmat u paidbah. Kane kam dei kaei kaei ruh hynrei ka jingkem ban ioh pyndonkam bad ka kam sylla sain pyrthei kaba thmu ban thaw ia ka jingjop lyngba ka jingmutdur,” u la bynrap.

Une u nongialam kane ka seng kaba la shah khein beain u la kam ruh ba kine ki jingkem ba beain jong ki pulit bad ki jingtei pop shawei pat ki pynshisha ia ka jingpulom jong ki Tnad syntiat.

U la bynrap shuh shuh ba kine ki jingleh jong ki pulit ki long kum ki kam lehnoh ba la kyrshan da ka sorkar jylla da ka jingthmu ban pynsngap jar ia kiba ialeh pyrshah bad ban khanglad ia ka jingialeh jong ki lyngba ki kam thok bad ki kam leh donbor.

U la kynthoh ruh ia kine ki arngut ki dkhot ba la wan pyndem halor ka jingkam ba ki donkam ban trei, da kaba ong ba baroh ki hap ban trei bad ban noh synniang.

“Kine ki arngut, kata u Dibarius Jyrwa 32 bad u Ridor Lyngdoh Nonglait 30 snem rta kiba la wan pyndem noh ialade ki la aiti ha ngi ia ki shithi iehnoh kam jong ki mynta la slem bah, kata shwa ba kin phet noh ban wad jaka rieh hapoh ka skad (skirt) ka sorkar jylla. Mynta ki la pyrta ba ki donkam ban trei. “Baroh ki hap ban trei. Wat lada phi shong phi sah ha ki iing ki sem ki kmie ki kpa jong phi. La khmih lynti ba phin synniang..yn ym don ki kmie ki kpa ki ban shu bsa sah ia phi junom,” u la pynpaw.