Kynnoh ka Congress ba ia ka kam bamsap kaba jur la ialam na ka ophis u Myntri Rangbah

Syllad | The Rising MeghalayaMay 1, 2025

Ka liang pyrshah Congress haka 30 tarik Iaiong ka la kynthoh tyngeh pyrshah ia ka Sorkar Jylla da kaba ong ia ka kam bamsap kaba jur bha la ialam na ka ophis jong u Myntri Rangbah ka Jylla (CMO).

Haba kren sha ki lad pathai khubor, u Joint Secretary ka AICC u Anthony Mathew u la ong ba ka Political Executive Meeting ka MPCC kaba la long haka sngi Balang ka la wanrah ia ka mat halor ki jingkynnoh kam bamsap kaba jur pyrshah ia ka sorkar ba la ialam da ka National People’s Party (NPP).

“Ha kaba baroh kiei kiei bad kano kano ki long ban die kaba la kyntiew ia ki dor ki mur jong ki jingdonkam ba kongsan, ki jingeh jong ki nongshong shnong ka Meghalaya ki la sdang na ki kam bamsap lyngba ki kam sam um bad sha kiwei pat ki kam bamsap. Phi ktah ia kano kano ka dei beit ka bamsap,” u la ong.

“Baroh kiei kiei ki dei ki bym lah shuh ban tehlakam bad u Myntri Rangbah um lah ban pyndonkam ia kano ka bor halor ka sorkar jong u namar ia ka kam bamsap kaba jur bha la ialam na ka ophis jong u, kumta ia ki kam bamsap kiba kham hapoh ruh ym shym la lah ban khanglad, kaba dei ka jingsngewkhia kaba la pynpaw da ki nongtrei ka Congress ha katei ka jingialang,” kynthoh shuh shuh u Mathew.

Halor kane, u nongialam ka AICC u pyntip ba ka Congress ka la rai ban shim bad bishar bniah ia kine ki phang bad ki mat na ka bynta ka jingmyntoi jong ki paidbah nongshong shnong ka jylla Meghalaya.