Kynjoh 40 tylli ki Coke Factory ha rilum Jaintia, khlem trading license kamai ki trok ka Star Cement

Syllad | The Rising MeghalayaNovember 19, 2021

Sa 5 tylli ki karkhana Coke Factory kila ioh No Objection Certificate (NOC) naka Jaintia Hills Autonomous District (JHADC) ban saiñ rnga dewiong ha rilum Jaintia.

Ia kane la ong da u Chief Executive Member (CEM), JHADC ma Thombor Shiwat haba jubab iaka jingkylli kaba la wanrah da u nongialam ka liang pyrshah u ma Awhai Andrew Shullai, uba la buh iaka jingkylli katno tylli ki Coke Factory baka JHADC kala ai NOC naduh u bnai Iaiong 2021 haduh 31 Risaw 2021 haka dorbar tlang haka sngi Thohdieng.

U CEM ula ong ruh ba ka konsil hadien ba kala dep bishar bin pa bin iaki kot ki sla bad ki kot ki sla ki shnong bad elaka ki ai iaka NOC. “Ngi buh ruh iaki kyndon ba kine ki Coke Factory kin ai ka bhah kaba 5 percent n aka jingioh nong ka jong ki nalor ka bai renewal iaka NOC,” la ong u CEM.

Kumba long mynta ka rilum Jaintia kala jyllei da ki Coke Factory bad ka jingdon kine ki Coke ha East Jaintia Hills kala kynjoh sha ka 40 tylli.

Hashuwa kane u ma Ma Andrew ula kylli hato ka karkhana Star Cement kala dep ioh ne em iaki Trading License ban kit ban bah ki trok kit dewbilat kiba ka pyniaid, ka jubab na u EM ba dei khmih iaka tnad Taxation u ma Wining Garland Sungoh kalong em bad ula ong ba na kaliang ka tnad kaba u dei khmih kan sa shong bishar halor kane ka kam namar ha kaba iadei bad ka jingai trading license iaki bar jylla kala don ka jingpyrshah naki synjuk.