Kylla surok ktieh ka surok kaba pyniasoh ia ki bun tylli ki shnong ha Saipung Block, ujor ka KSU sha u EE NEC

Syllad | The Rising MeghalayaJune 23, 2021

Ka surok kaba pyniasoh ia ki bun tylli ki shnong ha Sumer Elaka kaba hap ha Saipung Block kala kylla long ka surok ktieh bad ki paidbah ba shong ba sah haki 6- 7 tylli ki shnong ki hap ban ban im hapdeng ka jingsyrtok ban iaid ha kane ka surok kaba khohruh khohram.

Ka KSU Sumer Unit haka sngi Balang kala ai da ka dorkhat sha ka ophis u Executive Engineer PWD (Roads) NEC Division, Khliehriat uba dei peit ia kane ka surok ban dawa shna iaka surok kaba paka. Ka jingsniew jong kane ka surok kala pynlong ia ki 6-7 shnong naduh Samasi, Larket, Kseh, Pala, Khahnar, Muknor bad kiwei kiwei ban sahdien ha baroh kiliang.

Ha kane ka dorkhat kaba la ai da ki nongialam ka KSU Sumer ba kyntup ia u president bad secretary u Daraplang Salahe bad u Baitlang Paslein ka ong ba ka jingsniew jong kane ka surok kaba buh jingeh bha iaki paidbah ha ka khaii ka pateng bad khamtam haka pang ka shitom.

Ka surok ka shlei da ka um bad ka dap da ka ktieh bad bun sien ki kali ki sahkut bad dawa na ka NEC ban shna ia ka surok kaba paka ha katei ka thain ban roi ban par u paidbah ka thain Sumer baroh kawei.