Kut noh ka Shillong Cage Fighting Championship, pynliem u Johnny Nongrum ia u nong Uttarakhand

Syllad | The Rising MeghalayaJune 29, 2025

U Johny Nongrum u la lah ha ka ban pynliem pyrshah ia u Anurag Singh ba dei napoh ka jylla Uttarakhand ha ka rynsan iakhun jong ka Shillong Cage Fight Championship (SCFC), kaba la long ha Lariti Multipurpose Theatre, Mawkasiang haka 28 tarik Jylliew.

Kane kan dei syndon ka jingiakhun kaba shi spah sien ka jingim ka jong u Johny ha kaba u la khur haduh 88 tylli ki nam jop bad ban shah rem 12 tylli, kaba  la wan hadien ba u la kdat noh ia la ka jingim kum u rang ia kura ne u boxer sha ka Mixed Martial Arts.

Wat lada u Johny un wah noh ia ki gloves ka jong u, pynban u la kular ba un iai don bynta bad kane ka jingialehkai da kaba un shim pat kum u nonghikai ne u coach bad u nongaibuit aibor bad ai mynsiem ia kiwei pat ki rang bad ki thei samla, kiba thrang bad sliang ban long kum ki nsar ialehkai MMA  na kane ka jylla.

Ha kane ka khyllipmat jong ka jingiakhun, ka hall hi baroh kawei ka la shu ang bad khmih ia ka rukom ialehkai u Johny, kaba khlem da ailad ia u Anurag ban lah ban khie la ka khlieh ka jong u na kane ka miet jong ka jingiakhun.

Kiwei kiwei pat ki nongialehkai MMA ka jylla kiba la ioh ia la ka jong ka kabu ksiar ka jong kiba kin iakhun hakhmat u paidbah nongkyrshan ka jylla ki long ka Ribhalang Sunn, Darren Kharshandy bad u Ronald Khyriem kiba la mih paw na ka shlem sain dur jong ka  Happy Red Rooster, nalor u Johnny Nongrum bad David Chhangte, bad kiwei kiwei.

Haba phai sha ki resol na kiwei pat ki kyrdan iakhun jong kane ka jingiakob, ki nongjop ki long:

Fly weight: Nazareth Lalthazuala, Liannun Suantak, Donbok Nongrum, Lalnunsanga, Lalmangaihzuala, Jitesh Sarkar, Angel Patil, Rishanskhem Ripon.

Bantam weight: David Chhangte, Darren Kharshandy

Middle weight: Johny Nongrum

Atom weight: Ribhalang Sunn

Straw weight: Ronald Khyriem, Synrop Wahlang.

U kongsan ba la wan ban iadon lang ha kane ka janmiet dei u myntri ba dei khmih ia ka tnat Sports & Youth Affairs ka sorkar jylla u bah Shakliar Warjri bad symbud kongsan dei ka Dr M. Ampareen Lyngdoh myntri ba dei khmih ia ka tnat ka koit ka khiah jong ka sorkar jylla.