Kut noh ka prokram aijinghikai suh bad thain jain ba la pynlong da ka DDUCC Wahiajer

Syllad | The Rising MeghalayaSeptember 6, 2025

Ka prokram aijinghikai ba hynniew sngi ha ka kam suh bad thain jain na ka bynta ki kynthei ba la pynlong da ka Pt. Deen Dayal Upadhyaya Community bad ka Skill Development Centre (DDUCC) Wahiajer kaba la sdang naduh ka 28 tarik Nailar ka la kut noh ha ka 4 tarik Nailur 2025.

Ka DDUCC kaba dei ka jaka pule ba la kyrshan da ka NEHU ka la lah ban pynlong ia kane ka prokram kaba jop da ka jingwan iashim bynta jong ki 35 ngut ki kynthei kiba dei na ka thain bad na kiwei pat ki bynta ka Rilum Jaintia ha kaba ki la ioh ia ki jinghikai kiba janai lyngba ka jingpyni kaba treikam kaba la iasam lang da ki briew kiba la shah khot.

Ha kane ka sngi pynkut ia ka prokram la ia don lang ka ophisar na ka Tnad karkhana ka Sorkar Jylla kum ka Kongsan, u Dr. F.R. Sumer, Principal I/c, DDUCC, Prof. H. Lamin, u Retd. Founder Principal I/c, DDUCC, Andrew Sari, Secretary ka Wahiajer nalor kiwei pat.

Ha ka jingkren ka Kongsan ka la pynshlur ia ki nongiashim bynta ban ialeh pyrshah ia ki jingeh da kaba ieng ha la ki jong ki kjat bad ban pyndonkam ia ki jingtbit kaba ki la ioh pdiang lyngba kane ka prokram ban kyntiew ia ka kam ka jam bad ka ioh ka kot hapoh ka thain.

Ka la aijingmut ruh ban shim ia ki jingma bad ki jingeh namar kalong kaba donkam ia ki jinghikai jong ka jingim ba la ioh jinghikai bad ban pyndonkam ia ki tiar ICT kum ka Mobile bad Internet ban ioh ia ki jingtip kiba iadei bad ban thaw ia ka jingsngewthuh ban ioh ia ka jingkyrshan ba la pynjlan da ka jingkyrshan ka Sorkar Jylla bad Sorkar Pdeng lyngba ki skhim bapher bapher.

Kiwei pat ki nongkren ki la pynksan ia ka jingdonkam bad ka dor jong ka jingpynphriang ia ka jingtip shaphang ka jingpynbha ia ki jingtbit ha ka khaii pateng khamtam ha ka pyrthei mynta ryngkat bad ka jingdawa bad jingroi jong ka kam suh bad thain jain kaba la ktah ia ki kolshor ha kylleng ka pyrthei.

Ki la kyntu ruh ia ki kynthei ba iashim bynta bad khamtam ia ki samla ban buh kyrpang ia kane ka rukom trei kaba ki la ioh na ka prokram aijinghikai khnang ban pynkhlain ia ka jinglah jong ki kum ki briew bad ki dkhot jong ka imlang sahlang ha ka kam khaii pateng.

Ka jingthmu jong kane ka prokram ka long ban pynkupbor khamtam ia ki kynthei lyngba ka prokram pynbha ia ka jingtbit kaba long ka lad kaba khlain ban kyntiew ia ka jinglaitluid ha ka ioh ka kot bad ka jingkylla ha ka imlang sahlang. Ka jingnang jingstad ka ai ia ka jingtbit kaba lah ban iohi, kaba lah ban pyniaid iew kaba lah ban ialam beit sha ka jingpynmih. Kane ka ktah khamtam eh ia ki kynthei ha ki shnong nongkyndong ne kiba shah kyntait kiba lah ban don tang khyndiat ka lad ha ka liang ka ioh kam ioh jam.

Ki nongkren ki la ai khublei ia ki nongïashim bynta bad ki la kyntu ia ki ba kin buh ia ka jingpyrshang katba ki dang iakynduh ïa ki jingeh da ka jingiaishah bad ban burom ia ka dor jong ka por. Kane ka prokram ka dei ka bynta jong ka jingpyrshang kaba kham heh jong ka DDUCC bad ka NEHU ban kyntiew ïa ka jingpynroi ïa ki sap bad ka jinghikai kum shibynta jong ka National Education Policy 2020.

U Programme Coordinator u Ma Wolnish Rymbai u la pynpaw ka jingsngewnguh ia baroh kiba la wan iashim bynta bad u la ai khublei kyrpang ruh ia ka jingkhot jong ka DDUCC halor ka jinglah ban pynlong ia kiba kum kine ki prokram kiba aijingmyntoi ia ki nongshong shnong.

Ha kane ka sngi la sam ruh ia ki syrnot sha ki nongiashim bynta ha kane ka prokram. La pynkut ia kane ka prokram da ka jingkren ai khublei na ka Kong Wanda Lanong, Guest Faculty DDUCC.