Kut noh ka lympung 28th Inter School bad 10 Inter College Karate Tournament ka AMKA

Syllad | The Rising MeghalayaAugust 14, 2022

Ka lympung ialehkai Karate ba la tip ia ka kum ka 28th Inter School bad 10 Inter College Karate Tournament, ba la pyniaid ia ka da ka All Meghalaya Karate Do Association (AMKA), ka la poi noh sha kaba kut ha Indoor Sports Hall ka Laban Sports Club haka sngi Saitjain.

Kumban shu pynkynmaw ba ha kane ka kynti kaba mynta ki skul baroh kiba la poi ban aireng sha kane ka jingiakob ki long 52 tylli  skul bad 6 tylli ki kolej bad haba khein kyllum ki khynnah ba la poi ban iashim bynta ki long haduh 327 ngut.

Kongsan ba la wan ban sakhi lang ia ki katto katne ki jingiakhun phainal dei u Working President ka Meghalaya State Olympic Association u bah John F. Kharshiing ryngkat u bah Dipshon Ryntathiang kum u symbud kongsan bad synran  lang da ki nongialam ba hakhmat bad ki dkhot jong ka AMKA.

Ha kaba kut jong ka jingiakob, ka nam lahduh na ka liang ki skul ka long ba ha ka kyrdan ialehkai jong ki khynnah kynthei, ka nam lahduh ka leit sha ka kynhun ialehkai jong ka OM Roy Secondary School hadien ba ka la ioh ba kan khur 4 tylli ki takma ksiar bad mar 3 tylli ki takma rnong, ba wan ba-ar  pat dei KC Secondary School kaba la ioh ban khur 3 ki takma ksiar bad 3 tylli ki takma rnong.

Ha ka liang ki khynnah shynrang, ka skul ba la rah ia ka nam lahduh dei ka St Anthony’s  Higher Secondary School hadien ba ka la ioh  ba kan khur 4 tylli ki takma ksiar, 2 tylli ki takma rupa bad 8 tylli ki takma rnong kaba wan ba-ar dei ka Providence School kaba la ioh ban khur  4 tylli ki takma ksiar, 2 tylli ki takma rupa bad 4 tylli ki takma rnong.

Haba phai pat sha ka kyrdan iakhun jong ki kolej, ka kynhun ba la ioh ban rah ia ka nam lahduh dei ka  Shillong College kaba la ioh ba kan khur  3 tylli ki takma ksiar, 3 tylli ki takma rupa bad 7 tylli ki takma rnong, ka kolej ba wan ba-ar dei ka St Edmunds College kaba la ioh ba kan khur  3 tylli ki takma ksiar bad 1 ka takma rnong.

Ha kine ki lai sngi jong kla jingiakhun la mih paw ruh ki rang bad ki thei ialehkai ba kynsai kiba la biang pura ban rah syndon ia ki khusnam nongialehkai  kaba ha kane ka kynti kaba mynta ha ka kyrdan jong ki senior, kane ka nam la rah ia ka da u  Chjetis  Shylla Providence School bad junior pat la rah da u  Eric B Rynga St Anthony’s HSS.

Naka liang ki kynthei ha ka liang ki senior kane ka nam ka leit sha ka Rebeca  Nongspung ka Providence School bad junior ka leit sha ka  Emika D Myrthong ka  B.K Bajoria.

Ia ki takma, ki khusnam ba shimet bad ki trophy ka nam lahduh la sam da ki  karate coach ka AMKA, bah John Kharshiiing, bah Dip Ryntathiang, bah Hunlang Lytan President ka AMKA bad ba la pynshit pynshngain ia kane ka jingiakob da ka jingwan  ban sakhi ki khynnah skul lem bad ki kmie ki kpa jong ki khynnah.