Kut noh ka lehniam Shad Nongkrem hapdeng ka jingiphuh iphieng

Syllad | The Rising MeghalayaNovember 3, 2023

Ka lehniam ki Syiem Hima Khyrim ka ‘Shad Nongkrem’ ba ju pynlong shisien shi snem ka la kut noh haka 2 tarik Naiwieng hapdeng ka jingiphuh iphieng bad shongkun hapoh ka iingsad ha Smit, East Khasi Hills da ka jingwan iashim bynta shitrhem da ki rangkynsai bad ki thei samla jong ka Hima.

Kane ka Shad Nongkrem bad Pomblang kaba la neh 5 sngi kynthih kaba la khring ia ki paidbah na kylleng ka dei ka jinglehniam jong u khun u hajar jong ka Hima Khyrim ban ainguh ia ka Blei Synshar na ka bynta ka bha ka miat u khun u hajar, kata la ka long ha ban ioh ia u kba u khaw uba dap kyrhai, haka liang ka ioh ka kot, ka shongsuk shongsain, ka pule puthi bad kiwei kiwei.

Na ka liang u Syiem ka Hima Khyrim u Dr Balajied Sing Syiem ha ryngkat ki lyngdoh ki la pyndep ia ka jinglehniam Pomblang shibynta ban pynsngewbha ia u ‘Lei Shyllong bad ruh ia ki mynbarim jong ki nongsynshar ka pateng kaba la leit noh.

Ha kane ka sngi la wan sakhi ruh ia kane ka jingleh niam da u Symbud Myntri Rangbah ka Jylla, u Bah Prestone Tynsong, CEM ka KHADC u Bah Pyniaid Sing Syiem, MDC Fantin Lakadong, Grace Kharpuri, Lamphang Blah, P N Syiem, MLA Ardent Miller Basaiawmoit, Shakliar Wajri, u Chief Secretary ka Jylla Bah D.P Wahlang, Deputy Commissioner R. M Kurbah, DGP ka Meghalaya, Dr. Lajja Ram Bishnoi bad kiwei kiwei.

Na ka liang u Syiem ka Hima ula pyntip ba ka Shad Nongkrem ka dei ka jinglehniam kaba la rim bah kaba dei  ka jingainguh jong ki Khun ki Hajar ka Hima ia u Blei Nongbuh Nongthaw ba un kyrkhu kyrdoh baroh shisnem bad ka dei ruh ka jinglehkmen ban tehsong ia ka jingialong kawei hapoh ka Hima Khyrim hi baroh kawei.

Na ka liang u Symbud Myntri Rangbah ka jylla u Bah Prestone Tynsong ha ka jingkren u la ong ba kane ka Shad ka Kmen ka pynpaw ruh ia ka jingriewspah bad ka jingithuh ia ka kolshor kaba hiar pateng jong ka jaidbynriew.