Kut noh ka lehniam Behdienkhlam hapdeng ka phuh ka phieng; 13 tylli ki rot kiba rah ryngkat ki khubor

Syllad | The Rising MeghalayaJuly 15, 2025

Ka lehniam Behdienkhlam ba saw sngi kynthih ba ju pynlong man la u snem ka la kut noh haka lah sngi U Blei hapdeng ka jingiphuh iphieng ha Aitnar, ha kaba la wan ban iashim bynta da ki hajar ngut ki paidbah kiba dang bat dang ksoh ha la ka jong ka jingngeit niam tynrai.

Ha kane ka Behdienkhlaim kaba dei ka jingleh niam kaba heh tam hapoh Rilum Jaintia la sakhi ia ki jingleh niam leh rukom ba la iashim bynta da ki rangbah niam, ka jingwanrah ia ki 13 tylli ki rot ba la shna pynwandur itynnad da ki kot, ki dieng ki siej bad kiba don ia ki khubor sha ka imlang sahlang.

Napdeng ki 13 tylli ki rot ba la wanrah ha ka pung kyntang, ka khubor ba la rah da ka Seintyllilang Ladthadlaboh ka ai ia ka khubor kaba shai bad ka jingmaham kaba tyngeh halor ka jingkynrei jong ki karkhana coke hapoh Rilum Jaintia ha kaba ka khubor ka ong, “Stop the smoke before we choke. Today’s emissions, tomorrow’s extinctions, “lane (Sangeh ka jingpynmih tdem shwa ba ngin ym lah ring mynsiem. Mynta ka jingpynjaboh lashai ka jingduh jait noh.”

Ka jingshna ba la shna pynwandur ka pyni ia ki atoskhana kiba heh kiba pynmih ia ka tdem kaba rben- kaba kdew halor ka jingpynjaboh ia ka lyer bad kaba buh jingma ia ki nongshong shnong, ki khlaw ki btap bad ia ka koit ka khiah hapoh ka thain baroh kawei.

Kane ka khubor ka la khring jur hapdeng ki nongwan iashim bynta ha kane ka jingleh niam ha kaba bun na ki, ki la pynpaw ka jingsngewkhia kaba jur halor ka jingpynjaboh ia ka mei mariang bad kaba ktah ia ka koit ka khiah lyngba ka jingmih kynrei jong ki karkhana coke ki bym shym la iaid katkum ki kyndon hapoh ka thain.

Kane ka juh ka jingshna (rot) ka pynpaw ruh ia ka apot jong ka wah Myntdu ka nongker nongda iaka sor Jowai kaba la la pynbiang um ia ki briew jong ka mynta la slem bah. Hynrei, mynta kane ka wah ka la mad ia ka jingeh namar ka jingbret jaboh jabain kaba khlem sangeh ha ryngkat ka jingpynkynmaw da kaba pynbna, “Ka Myntdu kam dei ka jaka bret niut jong phi, to ngin pynim ia ka.”

Ka khubor ba la wanrah daka Seinraij Ummulong ka ai ka jingkhublei ia ki shipai India halor ka jinglen lade jong ki lyngba ka ‘Operation Sindoor’, katba ka Loomkyrwiang ka maham halor ka jingshaniah jong ki briew ha ka juk jingstad thymmai ne Artificial Intelligence (AI) da kaba thoh, “Ka jingkiew jong ka AI ka lah ban wanrah ka jinghiar ha ka jingstad briew. Ka AI ba la shna da u briew ka la kham stad ban ia u kynrad jong ka, ka la ioh ia ka jinglong ba janai kaba palat ia ka jinglah kane ka pyrthei.”

Ha kane ka jinglehniam ba khatduh la wan sakhi da u Symbud Myntri Rangbah ka Jylla, u Ma Sniawbhalang Dhar, ka Myntri ka Tnad ka Koit ka khiah ka Dr. Ampareen Lyngdoh, u MP ka Rajya Sabha Dr. WR Kharlukhi, u Myntri ka Tnad Revenue & Disaster Management u Ma Kyrmen Shylla, u MLA ka Jowai Ma Wailadmiki Shylla, u MLA ka South Shillong Ma Sanbor Shullai, ki MDC ka JHADC bad kiwei kiwei ki heh ki hain.

Haba aijingkren u Bah Sniawbhalang ula pynpaw ia ka jingsngew sarong ia kane ka lehniam kaba la lah ban lumlang ia baroh ki briew ha kawei ka jaka bad khlem da khein ia kano kano ka niam ne jingngeit. Ula pynpaw ruh ia ka jingkongsan jong ka jingiatylli ban pynlong ia kane ka lehniam kaba jop bad ula ai khublei ia ki paidbah kiba na ki niam bapher bapher kiba la iashim bynta lang.

Haba phai sha ka Datlawakor ka jingialehkai phutbol tynrai da ka bol dieng hapdeng ka Pynthor Nein bad ka Pynthor Wah ha kaba u Dolloi uba dei u Khlieh Nongsynshar u la long kum u nongput ne referee ha kaba la ngeit ba ka nongjop ha kane ka jingiakhun kan dei kaba bha ha ka liang ka rep ka riang mynta u snem, kata ha kaba ka Pynthor Wah ka la ioh ia ka jingjop hadien ka jingialehkai kaba iakhaid bha kaba neh 12 minit 44 sekhon.