Kut noh ka jingai jinghikai ka Avenues iaki khynnah skul ka Adventist Higher Secondary School

Syllad | The Rising MeghalayaAugust 26, 2023

Ban pynshlur bad ai mynsiem shuh shuh kumno ban long ki khynnah ki ba shlur na ka bynta ka lawei kaba phyrnai ka jong ki, ka Avenues ka la pynlong da ka APEX prokram kaba ai jinghikai kynthup naduh ka Communication ban iakren para briew, Scientific Thinking ka pyrkhat pyrdain katkum ka juk saian bad ka jingbha jingmiat ne Wellbeing.

Ia kane ka jingai jinghikai la pynlong haki san sngi lynter kaba la sdang naduh ka 21 tarik une u bnai kyrpang na ka bynta ki khynnah jong ka skul Adventist Higher Secondary School, Khliehtyrshi, West Jaintia Hills District haka sngi Thohdieng.

Ha ka sngi pynkut ia kane ka workshop la don lang ka Kong Mabel L. Kynta Additional Deputy Commissioner West Jaintia Hills District kum ka kongsan, ki nonghikai ka Adventist Higher Secondary School bad ki khynnah skul.

Ka Kong Jasmine Pearl Stone Laitphlang kaba dei ka Academic Head, Avenues, ka la ong, kawei na ki bynta kiba kyrpang jong kane ka workshop ka long ruh ban pynrung iaka rukom hikai Saïan bad Jingkhein kiba long ki sobjek kiba donkam haduh katta katta namar bun na ki khynnah ki sheptieng ïa kine ki sobjek namar ki pyrkhat ba ki long kiba eh. Ka jingthmu ka long ba khring ia ki khynnah ba kin kham sngewtynnad ia kine ki sobjek bad ban pynduh noh ia ka jingsheptieng na ki.

Nalor kata ka Kong Jasmine ka la batai shaphang ka rukom ai jinghikai jong ka Avenues da kaba pynwandur ha kata ka rukom ba iwei pa iwei i khynnah in ïoh jingmyntoi da kaba pynsngew ïa la ki jong ki jingmut, bad pynpaw ïa la ki jong ki jingtieng jingsyier bad ban ïathuh lem ïa ki jingthmu jong ki, khnang ba kin mlien ban pynproh ia ka rukom pyrkhat pyrdain jong ki bad ban pyntbit kumno ban nang ban rai lane decide bad ban jied lane choose ka ban tei ia ka long rynieng jong ki.

Lyngba kum kine ki jingpyrshang ka Avenues ka pynpaw ia ka jingkhmih lynti ban ioh pynbha bad pynrung shuh shuh ia ki jinghikai ki ban pynkhreh ia ki khynnah samla ka jylla jong ngi na bynta ka lawei jong ki la ka long ha kano kano ka liang lane jait kam ruh.

La ioh ruh ka jingkren na ka kongsan ka Kong Mabel L. Kynta, u Bah Mankhraw Kharbuli Project Lead Apex & Senior Faculty Member, AVENUES bad ki jingkren Testimonial na ki khynnah skul.

Ki khynnah skul jong ka Adventist Higher Secondary School ha kane ka jingai jinghikai ki la ïoh pdiang ruh ïaki syrnot.