Kut noh ka College Week ka Thomas Jones Synod College

Syllad | The Rising MeghalayaMarch 30, 2025

Ka Thomas Jones Synod College haka 29 tarik Lber kala pynhap pyrda noh iaka taiew lehkmen ne ka ‘College Week’ halor ka phang ka ‘Creating beautiful moment today for everlasting memories’, kaba sdang naduh ka 24 tarik Lber ha phyllaw ka kolej.

Ha kane ka sngi la donlang u MLA ka Jowai Ma Wailadmiki Shylla kum u kongsan haka jingdonlang ka Principal ka Dr. Iaraplang Dkhar, ki nonghikai bad ki samla pule.

U Ma Wailadmiki Shylla haka jingkren, ula ong kumba ngi don ka jingiapher ka dur bad ka dar, ngi don ruh ka jingiapher haka sap ka phong. Kumta kane kadei ka rynsan khamtam na ka bynta kito ki smala pule kiba don iaka sap ka phong bapher bapher.

U pynpaw ruh ka jingkyrmen ba ka jinglehkmen kaba shi taiew kan ai shisha ka lad iaki samla bad ba maki ruh la pyndonkam ia kane ka lad.

Shwa kane, u Vice Principal Ma WEH Lamin haba pyniaid iaka jingialang, ula pynpaw ka jingsngewnguh iaki kam ba bha jong u Ma Wailadmiki Shylla na bynta ka kolej kynthup ka jingithuh ka sorkar Jylla iaka Thomas Jones Synod Collage, Jowai kum kawei na ki jaka pule hapoh ka People’s College Grant in aid Scheme bad lyngba ka jingwan ka Meghalaya Games 2024 la ioh ban pynbha pynmiat iaka madan ialehkai basketball nalor kiwei kiwei ki jingdonkam bad jingmyntoi jong ka kolej.

La pynphuh shuh shuh iaka sngi pynhap pyrda da ka ki jingrwai kiba la ia shim bynta da ki nongjop ha ki iakop bapher bapher kiba la pynlong hapoh kane ka taiew kiba kynthup iaka iakop rwai tynrai, ka iakop rwai kynhun bad ka iakop rwai marwei.

Ha kane ka sngi u kongsan ula pyllait ruh iaka Annual College Magazine “Lumiere”. Iaka jingialang la pynwai da ka jingrwai College Anthem.