Kut noh ka ‘Bootcamp training’ ba 3 sngi ba la pynlong da ka MPCC ha Shillong

Syllad | The Rising MeghalayaOctober 6, 2024

Ka ‘Bootcamp training’ ba lai sngi kynthih ba la khot pynlong da ka Meghalaya Pradesh Congress Committee (MPCC) na ka bynta ki samla don sap ka la kut noh ha ka 5 tarik u Risaw ha ka nongbah Shillong.

Ia kane ka prokram aijinghikai la btin lynti da u Incharge ka AICC u Dr A. Chellakumar bad u Adv Mathew Antony, Joint Secretary AICC bad la kyrshan da u president ka MPCC u Bah Vincent Pala, katba na ka liang u MP ka Tura u Saleng Sangma u la peit ia ka jingpynbeit bad ka jingpyntrei kam ha ka thain, ong u kyrwoh.

Katba na ka liang u GS ka MPCC u Sanjay Das bad u Manuel Badwar Secretary ka PCC ki la pyniaid ia kane ka jingai jinghikai ryngkat bad ki nonghikai.

Kane ka jingai jinghikai ka kynthup ia ka phang kaba iadei bad ka jingtbit ha ka jingiadei para briew, ki lad jingtip lyngba ka jingiakren, ka jingkren paidbah, ki tiar ba iadei bad ki social media ryngkat bad ki nongrim jong ka histori saiñ hima sima, ka ioh ka kot bad ka jingtip shaphang ka ain.

“Ngi la rai ban ai jinghikai ia ki president ki DCC bad ki BCC halor ka Seng ban pynkhreh ia ki na ka bynta ka elekshon MDC ka ban wan,” ong u kyrwoh.