Kut noh ka Behdienkhlam ka Seinraij Ialong hapdeng ka jingiphuh iphieng

Syllad | The Rising MeghalayaAugust 11, 2023

Ka lehniam Behdienkhlam jong ka Seinraij Ïalong kala poi noh sha kaba kut haka sngi Palei. Kane ka lehniam kala sdang naduh ka 2 tarik Nailar bad la pynkut iaka da kaba bret iaki rong ha Tre Pyrda ha Ialong.

Ki shnong kiba iashimbynta ha kane ka lehniam ki long ka Wahiajer, Nongkhyllep bad ka shnong Ialong.

La pyndep iaka jinglehniam da u Langdoh ryngkat ki wasan, ki Maji bad u Sangot. Ki jinglehniam ki kynthup naduh ka Khrong ka Khri, ka Choh Thyndai bad ka Knia Khlam ban beh iaka pang ka shitom bad iaka sih ka roi na ki shnong ki thaw bad ban kyrpad kyrpon ia u nongbuh nongthaw ban kyrkhu kyrdoh ban bha ka rep ka riang.

Ki kynrem ki lyndan kiba wan sakhi ki kynthup ia u Myntri Rangbah Conrad K Sangma, Symbud Myntri Rangbah ma Sniawbhalang Dhar, u Chief Executive Member JHADC u Thombor Shiwat, u MLA Umroi u Damanbait Lamare, u MLA Jowai, u Wailadmiki Shylla, ka MLA Sutnga Saipung ka Kong Santa Mary Shylla, MLA barim ka Sutnga Saipung u Shitlang Pale, ki MDC, Deputy Commissioner West Jaintia Hills u Bah BS Sohliya, IAS, u Superintendent of Police West Jaintia Hills C Syrti, ki doloi na ki elaka bapher, President ka Seinraij Ialong u Pyrkhat Shylla bad kiwei kiwei

Haka sngi pynkut, ki khun ka Seinraij Ialong na kylleng ki dong bapher bapher kumjuh ka shnong Wahiajer bad Nongkhyllep ki pynpoi haduh 10 tylli ki rot ha Tre Pyrda

Katba ïaka Knia Khlam bad ka Wahbhang kiba dei ki lehniam ba khadduh la pyndep hadien ka jingbret iaki rot.