Kut biang ka Shillong Lajong FC da ka jingiakhaid pyrshah ia ka Neroca FC ha ka jingialehkai I-League

Syllad | The Rising MeghalayaNovember 9, 2023

Ka Shillong Lajong FC haka sngi Palei ka la mad biang ia ka jingiakhaid ha ka jingiakhun pyrshah ia ka Neroca FC ka Manipur da mar shi kol ha ka jingialehkai kaba nyngkong ha la ka jong ka jaka hapoh SSA Stadium, Polo, Shillong.

Ka jingialehkai ka la long kaba itynnad ha kaba ka Shillong Lajong kala ioh ban pynkhih jar nyngkong ha ka minit kaba 33′ lyngba u kapten jong ka uba dei na Brazil u Daniel Gonsalves.

Ka jingioh thep ia kane ka kol ka la pynkhih mynsiem ia ki paidbah nong peitkai kiba la wan ban sakhi bad ban aijingkyrshan pura ia ka Lajong FC. Hynrei hapdeng ka jingiakhun kaba bteng shakhmat u rangialehkai ba shakhmat ka Neroca na Jamaica, u Fabian Reid ula ioh ban pynphai ia ka kol ban pyniakhaid ha ka minit kaba 79′, bad ka jingiakhun ka la kut noh da 1-1.

Ha kane ka sngi la wan ban sakhi da ki hajar ngut ki riew ieit phutbol ka jylla na ka bynta ban sakhi ia kane ka lympung ialehkai football kaba heh tam hapoh ka Ri bad kaba la wanphai biang hadien saw snem ha kane ka nongbah Shillong.

Ka Shillong Lajong kan sa iakhun biang ha la iing ha ka 14 tarik Naiwieng pyrshah ïa ka Sreenidi Deccan na Hyderabad ha ka por 2 baje nohphai sngi ha madan SSA Stadium, Polo, Shillong.

Lah ban kdew ba ka Shillong Lajong FC ka la sdang ia kane ka tournament lyngba ka jingiakhaid kaba mar 1-1 kol pyrshah ia ka Mohammedan SC na Kolkata ha ka jingialehkai kaba la long hapoh Naihati Bankimanjali Stadium ha West Bengal ha ka 3 tarik une u bnai.