Kurup ka Tnad Custom ia ki dawai Meth tablets ba T.12 klur; thang ia u drok ba kot haduh T.191 klur

Syllad | The Rising MeghalayaJanuary 28, 2025

Ki dkhot ka Tnad Custom ki la ioh ban kurup noh ia ki dawai kuli pynbuaid Meth tablets kiba shongdor haduh palat T.12 klur bad pynjulor noh ia u drok ba shongdor haduh palat T.191.32 klur.

Lyngba u kyrwoh ba la pyllait ha ka 28 tarik Kyllalyngkot, ka Tnad Custom ka pyntip ba hadien ba la ioh ia ka jingtip kaba thikna, ki ophis napoh ka HQ Preventive, Custom, NER, Shillong ha ryngkat ka CPF Silchar ki la ioh ban bat noh ia artylli ki scooty ha Rangirkhari Point, Sonai-Silchar Road, Assam ha ka janmiet jong ka 26 tarik Kyllalyngkot. 

Kine ki scooty la iathuh ba ki dei kiba wan na Churachandpur, Manipur da ka jingthmu ban leit sha Silchar, Assam. Ha ka jingtalasi la lap ia hynriew tylli ki pla ba la buhrieh ia ki song ha baroh kine ki artylli ki scooty.

Hadien la lap ia ki dawai kuli rong soh bad hadien ba la tess da ka NDPS Field Test Kit la pynthikna ia ka jingdon jong u drok methamphetamine.

“Une u dawai kuli pynbuaid u don ia ka jingkhia kaba haduh 12 kilo bad uba shongdor haduh palat T.12 klur, bad la kem noh ia kine ki arngut hapoh ki kyndon jong ka NDPS Act, 1985 bad kurup noh ruh ia ki kali ba la pyndonkam. Ka jingtohkit mynta ka dang iai bteng,” ong u heh ka tnad Custom.

Katba ha kane ka taiew ba la dep, shibynta jong ka Drug Destruction Drive, ka Commissionerate of Customs, NER, Shillong ka la pynduh noh ia shibun bah u drok ba la ioh kurup na Shillong, Guwahati, Imphal, Dimapur bad Karimganj.

Baroh ki la don haduh 15.90 kilo u drok Heroin, ki dawai Metamphetamine 92.776, 355.40 gram u drok Cocaine bad 1567.161 kilo u kynja ba shongdor haduh palat T.191.328 klur ia kiba la pynduh jait noh ha ka rukom ka ban ym ktah ia ka mariang.

Na ka liang ka tnad Custom ka la shimkhia ha ka jingiakhun pyrshah ia baroh ki kam khaii beain bad ka jingkhaii drok beain, ki dawai pynbuaid, ki mar khlaw kiba im, ksiar, pisa thok ka India, ki kam thok ha ki kam khaii bad kam thok pisa.