Kular u Myntri Bording ban pyndap ia ki kam ba lait hadien ba kham biang ka pla tyngka

Syllad | The Rising MeghalayaMarch 20, 2025

U Myntri ka Tnad Bording u Abu Taher Mondal ha ka 19 tarik Lber u la kular ba ka jingthung kam pura na ka bynta ki kam kiba lait yn sa pyndap tad hadien ba ka jinglong jingman ka pla tyngka ka Meghalaya Energy Corporation Limited (MeECL) ka la kham biang.

Hadien ka jingiakynduh ia ki nongmihkhmat na ka Seng Federation of Khasi Jaintia and Garo People (FKJGP), u Mondal u la ong, “Kumba ka long mynta ngi don ia ka jingeh kaba khraw ha ka liang ka pisa tyngka, bad kane ka kam baroh kawei bad namar kane ka jinglong jingman ngim pat lah mardor ban iaid shakhmat, hynrei dang shen ngi la pynbna ruh ia ki katto katne ki kam kiba lait. Ia ka jingthungkam ba pura kumba la dawa da ka FKJGP yn sa leh da hadien ba ka MeECL ka la kham biang ha ka pla tyngka.

Na ka liang u Myntri u la pdiang ruh ba kine ki kam kiba lait ki la don mynta la kham slem namar ki daw bad ki jingeh kiba bun.

Watla katta u Myntri u la ong, “Na ka liang ka sorkar ka ju bishar bniah na ka por sha ka por ym tang ia ka MeECL hynrei ia kiwei ruh ki Tnad ban iohi ba ki lad ioh kam ioh jam ki dei ban plie na ka bynta ki samla jong ngi. Ngi dang iaid shakhmat halor kane ka bynta.”

Haba pynpaw halor ki kam kiba lait hapoh ka corporation, u Mondal u la ong, “Kumba ka long mynta ngi la pynbna na ka bynta ka kam field engineer na ka bynta ka electrical bad mechanical kaba long 57 tylli bad field engineer na ka bynta ka civil 10 tylli, field supervisors na ka bynta ka electrical bad mechanical 54, field supervisors civil 10, kata baroh 67 ki post engineer bad 64 supervisor.”