Kular u Momin ban pynkhlain ia ka BJP ha ka jylla hadien ba shimti kam

Syllad | The Rising MeghalayaOctober 4, 2023

U Rikman G Momin uba la shimti kam kum u president bathymmai jong ka seng Bharatiya Janata Party (BJP) ha ka jylla ha ka sngi ba Ar u la kular ban trei shitom na ka bynta ban kyntiew bad pynkhlain shuh shuh ia ka party ha Meghalaya.

Haba kren sha ki lad pathai khubor u Momin u la ong, “Hadien ba nga la shimti ia ka kam kum u president, nga la long uba kloi ban pynkhlain ia ka party da ka jingiarap jong ki nongtrei bad ki nongkyrshan ka party.”

Halor ka jingkylli u la ong; “Ngi don arngut ki MLA. Ka dei ka jingiatreilang kum ka kynhun bad haba shim kyllum ia ka jingioh vote la sakhi ba kane ka la kiew shibun bad ngin nang pyrshang ban jop shuh shuh palat ia ka ar seat.”

Nalor kata u pyntip ruh ba ka party ha ka jylla ka dang ap ia ka hukum na ki nongialam napoh central ban pynkhreh na ka bynta ka Lok Sabha ka ban long ha u snem u ban wan.

U Momin u la kam ruh ba ha ki jingmut jingpyrkhat jong ki briew, ka dang don ka jingkyrmen na ka bynta ka BJP namar u Myntri Rangbahduh Narendra Modi u la trei bha na ka bynta kiba duk.

Shuh shuh u la ong ba ka party hapoh ka jingialam jong u Modi kan pynthikna ba ki skhim ka sorkar pdeng ba kin poi hapoh ka jylla Meghalaya.

Ha kawei pat ka bynta une u president ka BJP ka jylla u la ong ba ka party ka ieng pyrshah ia ki kam bamsap bad ong ruh ba ka party kan iai bteng ban buh jingkylli halor kino kino ki jingkynnoh bamsap pyrshah ia ka sorkar MDA.

Ha kaba iadei bad ka sorkar MDA kaba ka party ka ia don lang u la ong ba lada don kino kino ki jingkynnoh ka don ka rynsan na ka bynta ban buh jingkylli.