Kular u MLA ban shimkhia halor ki 151 tylli ki kam kiba lait hapoh ka DSC ha West Jaintia Hills

Syllad | The Rising MeghalayaMay 17, 2025

U MLA ka Jowai u Bah Wailadmiki Shylla u la kular ban shim ia ki sienjam ba pura ha kaba iadei abd ki 151 tylli ki kam sorkar kiba lait hapoh ka District Selection Committee (DSC) ha West Jaiñtia Hills.

Kane ka jingkular ka la wan long hadien ba ka seng Jaintia Students’ Union (JSU) ka la ai por shi bnai ban leh ei ei noh halor kane ka jingthung kam kaba la sahteng mynta la slem.

“Nga la pynlong ia ka jingialang kaba seisoh bad u Deputy Commissioner ka West Jaiñtia Hills, u Abhinav Kumar Singh, uba dei ruh u Chairman ka DSC bad u Secrtary ka DSC ban iakren halor ka jinglong jingman kaba iadei bad kane ka jingpynrung kam kaba dang iaid shakhmat,” ong u Bah Wailadmiki.

U la ong ruh, “Nga la bhah ia u Deputy Commissioner ba un iatreilang bad baroh ki tnad sorkar ban lum ia ki jingtip bathymmai halor ki kam kiba lait bad ban pynsted ia ka jingthungkam na ka bynta baroh ki kam kiba dang sahteng.”

Ka JSU dang shen ka la kynthoh tyngeh halor ka jingpynslem ban pynlong ia ki eksam na ka bynta ki kam kiba lait ia kiba la pynbna naduh jan saw snem mynshuwa, khamtam eh ia ki 92 tylli ki post Grade IV ba la pynbna naduh ka 19 tarik Naiwieng 2021. U MLA u la pyntip ba ia ka eksam na ka bynta kine ki post la buh ban pynlong ha u Nailur 2025.

Ha kaba iadei bad ki kam Lower Division Assistant (LDA) ba la pynbna ha u snem 2021, u Bah Wailadmiki u la ong ba na ki 54 tylli ki kam ba la pynbna, 49 ngut ki la pyndep ia ka typing test. Katba ia ka hukum thungkam na ka bynta kiba bun la dep ban pynmih, hynrei kito kiba hap hapoh ka ophis jong u Deputy Commissioner ki dang sahteng.

“Nga la pynthikna ba ia ki shithi thungkam na ka bynta ki kam LDA kiba dang sah ha ka ophis jong u DC yn sa pynmih ha ka sngi Nyngkong,” u la ong bad bynrap ba san tylli ki kam ki dang sah khlem pyndap namar ka jingduna ki briew kiba biang.

Na ka bynta ka kam Lady Supervisor ba la pynbna ha u snem 2017, u MLA u la kdew ba katei ka kam ka dang sahkut hapoh ka iingkashari namar ki jyrwit jyrwat kiba iadei bad ka reservation roster system.

“Nga la rah ia kane ka kam bad nga la aijingmut ba ka DSC bad ka Tnad Social Welfare kin pynlong ia ka jingiakren ban weng ia kane ka jingeh,” u la bynrap.

Nalor kata u MLA u la ai ruh ia ka jingpyntip halor ka jingpynrung kam jong u snem 2020 na ka bynta ki 14 tylli ki kam Sericulture Demonstrator, 4 tylli ki kam Gram Sevak bad kawei ka kam Gram Sevika. U la pynthikna ba ia ki eksam la dep ban pynlong bad ia ka result yn sa pynbna ha u taiew u ban wan, bad baroh ki jingthungkam bad ki posting yn pyndep hapoh u bnai Naitung 2025.

Kiwei pat ki kam kiba dang sahteng ki kynthup:

34 tylli ki kam LDA ba la pynbna ha u bnai Kyllalyngkot 2025.

2 tylli ki kam Weaving Demonstrator ba la pynbna ha u bnai Nohprah 2024,

1 Male Supervisor, 3 Gram Sevak, 2 ngut ki Gram Sevika, 1 Copyist bad sa 12 tylli ki kam LDA,

Sa 4 tylli ki kam Gram Sevak ia kaba yn sa dang pynbna.

Lah ban kdew ba na ka liang ka JSU ka la byrngem ban pynlong da ka jingiakhih lada ka DSC kam leh ei ei halor kane hapoh ka shibnai, hynrei ka jingtuklar kloi jong u MLA ka thain ka la wanrah ia ka jingkyrmen ba ia kine ki kam kiba la sahteng la slem yn lah ban pynurlong shen.