Kular u DyCM ban khmih halor ka jingdawa kyntiew kyrdan ia ka Mawrong Sub Centre sha ka PHC

Syllad | The Rising MeghalayaJune 13, 2025

U Symbud Myntri Rangbah ka Jylla, u Bah Prestone Tynsong haka 12 tarik Jylliew u la kular ban khmih bniah halor ka jingdawa ban kyntiew kyrdan noh ia ka Mawrong Sub Centre sha ka Primary Health Centre (PHC).

Ia kane la pyntip da u MLA ka NPP na Mawhati u Bah Charles Marngar uba la ialam ia ka kynhun ka Synjuk ki Nongialam Shnong  Mawrong Road, Ri Bhoi district kaba dei ka Synjuk ki Rangbah Shnong na ki shnong Mawrong bad ki thain ba marjan  hadien ba la dep ban aiti ia ka jingpynkynmaw sha u Bah Prestone.

Haba kren sha ki lad pathai khubor hadien ka jingialang, u Bah Charles u la ong, “Ka jingjngai hapdeng ka Umsning CHC sha ka shnong Mawrong ka long haduh kumba 17 kilomitar. Kumta kane ka la wanrah ka jingeh kaba khraw ia ki nongshong shnong khamtam ia ki longkmie kiba armet.”

“Nga sngewkmen mynta ka sngi ban ioh ia ka jubab kaba sngewtynnad na u Symbud Myntri Rangbah bad ngi kyrmen ba un shim mardor ia ki sienjam ban kyntiew kyrdan noh ia ka Mawrong Sub Centre sha ka PHC,’ u la bynrap.

Katkum ka jingong ka jong u, ka shnong Mawrong ka la mynjur ban pynioh jaka na ka bynta kane ka jingkyntiew kyrdan.

Ha ka shithi, ka Synjuk ka pynpaw ka jingsngew nguh hadien ba u Bah Prestone u la rah iakren ia kane ka kam lyngba ka shithi kaba 13 tarik Jymmang 2024, bad 2 tarik Iaiong 2018.

“Wat hapdeng kane, ka Tnad ka koit ka khiah kam pat shim satia ia kino kino ki sienjam halor kane ka jingtyrwa kyntiew kyrdan. Kane ka jingbym leh ei ei ka dang bteng ban ktah jur ia ki hajar ngut ki nongshong shnong kiba shaniah tylli ha kane ka jaka sumar kaba dang duna shibun ha kaba iadei bad ki lad jingsumar sha ki paidbah nongshong shnong,” ki la ong.

“Ngi kwah ruh ban banjur ba nalor ki jingtei ka jingbuh ia ki nongai jingsumar kiba la tbit kynthup ia ki doktor, ki nurse bad kiwei pat ki nongtrei ka long kaba kongsan na ka bynta ka jinglah treikam bha jong kane ka jaka sumar. Ka jingbym don ia ki nongtrei kiba bang, ka jingthmu ban kyntiew kyrdan kan iai neh kum ka bym pat shym la urlong,” ban jur ka Synjuk.