Kular u DC-WJH ban sdang shen ia ka klas miet ia khynnah SSLC ki bym pat ioh rung klas

Syllad | The Rising MeghalayaJune 1, 2025

U Deputy Commissioner ka West Jaintia Hills, u Abhinav Kumar Singh haka 31 tyarik Jymmang u la kren halor ka jingsngewkhia kaba nangjur halor ka jingbym ioh rung klas hapdeng ki samla kiba dang shu pass ia ka eksam SSLC ban ioh bteng ia ki jingpule ba kham shalor jong ki ha ki jaka pule hapoh ka District bad pynthikna ba ka jingtyrwa ban sdang noh ia ka klas miet (Evening Batch Session) ka la don ha ka jingbishar bniah.

“Ngi la dep ban thoh sha ka Directorate ban pan jingbit ban sdang noh ia ka klas miet. Katkum ka kaiphod ba la ioh pdiang na ka seng ki samla pule la ong ba ki dang don sa kumba 124 ngut ki samla ki bym pat ioh ban rung klas. Lada ioh ka jingmynjur kane ka klas miet kan lah ban pdiang haduh 200 ngut ki samla pule,” pyntip u DC.

Kane ka jinglong jingman ka la wan long hadien ka sienjam ba la shim ha ka 30 tarik Jymmang ha kaba ka seng Jaintia Students’ Union (JSU) ka la pynsangeh noh shipor ia ka jingiakhih hadien ba ka la ioh pdiang ia ka jubab kaba sngewtynnad na ka District School Education Officer (DSEO), ka Kong A.P. Syiem.

Na ka liang ka seng JSU ka la ong ba haduh jan kumba 200 ngut ki samla kiba pass ia ka SSLC kim shym la ioh lad ban bteng ia ki jingpule jong ki ha kino kino ki Government Higher Secondary School hapoh Jowai.

Halor kane ka DSEO ka la tyrwa da kaba thikna hakhmat u DC na ka bynta ban plie ia ka klas miet hapoh Kiang Nangbah Govt Higher Secondary School.Kane ka jingtyrwa ka kynthup ruh halor ka jingthung ia ki Assistant Lecturers (Arts) bad ki nongtrei ha ryngkat ka jingithuh ia ki jaka thoh eksam ban pyniaid ia ki board eksam ki ban sa wan hapoh kane kane ka jingpynkylla kaba thymmai

“Mar ia ioh ia ka jingpynthikna na ka Directorate, yn pyniaid shakhmat ia ka plan ban pynthikna ba yn ym don iwei ruh na kine ki samla ki ban shah iehnoh shadien,” bynrap u DC.