Kular u CE ban pynsted ia ka jingmaramot ia ka madan First Ground ka SSA Stadium

Syllad | The Rising MeghalayaJune 20, 2024

U Chief Engineer ka State Sports Council ka Meghalaya (SSCM) ha ryngkat u kontrator ba pyntrei ia ka madan artificial turf jong ka First Ground ka SSA Stadium, Polo, ki la kular ia u President bad ia baroh ki dkhot jong ka SSA ba kin shimkhia bad pynkloi ban maramot bad pynbha lut ia baroh ki bynta  jong kane ka madan.

Ia kane la pynpaw da u President ka Shillong Sports Association u Bah Banteidor Lyngdoh uba dei ruh  u MLA haka 19 tarik Jylliew, hadien ba ka la don ka jinghiar leit jurip ia baroh ki bynta jong kane ka madan bad ruh ia ka stadium kaba long kum shibynta ban buddien ia ki kam kiba dang sahteng bad ki bym pat lah  ban pyndep ha kane ka jaka.

Ha kane ka jingleit jurip nalor Bah Banteidor la ia don lang ruh u CE ka SSCM, u kontrator bad ki dkhot nongkitkam ka SSA kiba la iaid tawiar ia baroh ki bynta jong kane ka madan ban khmih bniah ia ka jinglong jingman ka jong ka.

Na ka liang u Bah Banteidor u la pynpaw ruh ba  kane ka jingleit jurip ne ka ‘joint inspection’ hynne ka sngi Balang kan ym kut tang  ha kane ka jingwan buddien hynrei ka SSA kan sa da bynrap artad bad ka jingthoh ia kaba yn sa ai sha ka sorkar.