Kular ka Sorkar ban leh da kaba tyngeh pyrshah ia kiba donkti thombor ia ki kynthei khynnah

Syllad | The Rising MeghalayaJuly 11, 2025

U Myntri ka Tnad Social Welfare u Bah Paul Lyngdoh haka 10 tarik Naitung u la kular ba na ka liang ka Sorkar kan shim ia baroh ki lad ki lynt kiba donkam ban pynthikna ba kito kiba donkti ha ki kam thombor pyrshah ia ki kynthei khynnah kin ngat ha ka jingshah pynsaja.

Haba jubab ia ka jingkylli halor kane ka mat, u Bah Paul u la pynthikna ia ka jingkut jingmut kaba skhem jong ka sorkar ban pynduh jait ia ki kam thombor pyrshah ia ki kynthei  khynnah hapoh ka jylla.

Katkum ka jingong ka jong u, ki bor bapher bapher kiba treikam hapoh ka jingbtin jong ka Tnad ki pyni ia ka jingaiti lut jong ka sorkar ban shimkhia ha kaba iadei bad kane ka phang kaba kongsan bha.

“Ha ka jingshisha ngi don ia ki bor bapher bapher kiba treikam hapoh ka jingbtin jong ka Tnad Social Welfare kaba pyni ia ka jingkut jingmut kaba iai bteng ka jong ngi ban tehlakam bad pynduh jait ia ki kam thombor pyrshah ia ki kynthei khynnah. Ka long kaei kaei kaba pynkhih jingmut, hynrei ngin shim ia ki sienjam kiba tyngeh pyrshah ia kiba donkti ha kiba kum kine ki kam thombor,” ong u Bah Paul haba kren sha ki lad pathai khubor.

Nalor kata u Myntri u la ai ruh ka jingiaroh ia ka jingtreikam jong ki Commission bad ki Committee bapher bapher kiba treikam hapoh ka Tnad kiba la shimkhia ha kaba iadei bad kane ka phang.