Kner kti jingiarap ka Sur U Paidbah EJH sha ka samla kaba mih khmat iaka ri ha ka World Armwestling C’ships

Syllad | The Rising MeghalayaAugust 15, 2024

Ka Sur U Paidbah East Jaintia Hills District kum shibynta ban kitbok kitrwiang bad ai iaka jingkyrkhu kyrdoh ia ka thei samla Olivia Dkhar ka ba mihkhmat iaka ri sha ka World Armwrestling Championship kala kner iaka kti jingiarap jong ka da kaba synniang T.43,500 sha kane ka samla haka 10 tarik Nailar.

Kane ka jingiakop iakhun kti ka long ha ri Moldova naduh 15-25 tarik une u bnai Nailar.

Ia kane ka pisa la aiti haka jingialam Chief Advisor u Ma Kerlang Ksoo bad u General Secretary u Ma Deibormi A. Syad ha ryngkat bad ki para dkhot jong ka Sur U Paidbah East Jaintia Hills.

Na kaliang ka Sur U Paidbah ka don ka jingngeit kaba skhem ba ka samla Olivia Dkhar kan ialehkai bha bad ban wanrah ruh iaka nam ka burom iaka district, jylla bad ka ri baroh kawei.

Ka Sur U Paidbah, East Jaintia Hills kala pynpaw ba kane ka jingpyrshang kaba rit jong ka ban kyrshan ia u/ka uno uno u samla ne ka samla kiba mihkhmat iaki district ha ki rynsan bapher bapher ka long ban ai mynsiem ban pynshlur ba kin jop haka jingim.

Kum kane ka jingkyrshan iaki samla kam dei ka sien kaba nyngkong bala leh da ka Sur U Paidbah East Jaintia Hills, hynrei la bunsien kala iarap bad wat ia ki lanot bor mariang bad kiwei kiwei ki jingjia aksident, la pynpaw u kyrwoh ka Sur U Paidbah.

Ka Sur U Paidbah East Jaintia Hills kala ai khublei ia baroh ki paralok kiba la synniang manla ka por bad ha kano kano ka por ba donkam na ka bynta ban ai jingiarap bad ban kyrshan ia kiba donkam jingiarap khamtam haka shitom saja.